پاکستان د امن-۲۳ څو ملي سمندري مشقونه پېل کړل

د​​څو هېوادونو امن-۲۳ سمندري مشقونه،​​چې پاکستان يې کوربه توب کوي، د جمعې په ورځ (د فبرورۍ په ۱۰مه) پېل شول، چې د ۵۰ څخه زیاتو هېوادونو سمندري ځواکونه په یو لړ فعالیتونو او مشقونو کې سره یوځای کوي ترڅو​​امنیت​​او همکارۍ ته وده ورکړي او د سمندري ترهګرۍ او سمندري غلا پروړاندې مبارزه وکړي.

د څو ملتي مشقونو اتمه ګڼه په کراچۍ کې د پاکستان سمندري ځواکونو په ډاک یارډ، چې د آبدوزو يوه اډه ده، کې د جهنډې پورته کولو په ښکلې مراسمو کې په رسمي توګه پرانسته وشوه.

په کراچۍ کې د پاکستان د سمندري ځواکونو کمانډر وائس ایډمرل اویس احمد بلګرامي په کراچۍ کې وویل، کښتۍ، الوتکې او د ځانګړو عملیاتو ځواکونه او همدارنګه د ۵۰ څخه زیاتو هېوادونو څارونکي د پنځو ورځو پدې مشق کې ګډون کوي چې د کراچۍ په ساحل کې په عربي سمندر کې ترسره کیږي.

بلګرامي په کراچۍ کې د چهارشنبې په ورځ په یو نيوز کانفرنس کې وویل، "د دې مشق اصلي هدف​ د یو بل د سمندري مفکورو او عملیاتي کلتورونو په اړه د پوهېدو لپاره​ د یو فورم چمتو کول دي، د ګډ کار کولو وړتیا لوړول او په سمندر کې د ګډو ګواښونو سره د مبارزې لپاره د لارو او وسیلو پیژندل دي."

د امن-۲۳ مشق په دوو مختلفو مرحلو ویشل شوی -- بندر او سمندر.

د بندر په پړاو کې فعاليتونه لکه سیمینارونه، بحثونه، پريزينټيشنونه او نړیوالې ناستې شاملې دي.

په سمندري پړاو کې تاکتیکي فعاليتونه او مشقونه شامل دي چې د سمندري امنیت د موضوعاتو سره تړاو لري چې پکې سمندري غلا او د ترهګرۍ سره مبارزه، لټون او ژغورنه، د توپونو ډزې او هوایي دفاع شامله ده.

په سمندري پړاو کې د نړېوالو بېړیو بیاکتنه شامله ده، چې ملي او بهرني لوړ پوړي چارواکي به پکې ګډون وکړي.

د همکارۍ اوږد مهاله دود

چارواکي او شنونکي وايي، د امن-۲۳ مشقونو کوربه توب د پاکستان د ډیرو کالو کار ته دوام ورکوي چې له بحري ځواکونو سره په سمندر کې په پولیسۍ کولو کې مرسته کوي.

پاکستان ​​له ۲۰۰۷ کال راهيسې امن مشقونه هر دوه کاله وروسته ترسره کوي​​.

په ۲۰۰۷ کال کې، ۲۸ هېوادونو په دغه مشق کې برخه اخیستې وه. د کووېډ-۱۹ د محدودیتونو سربېره، دا شمېر تر ۲۰۲۱ کال پورې ۴۳ هېوادونو ته رسیدلی و.

بلګرامي وویل، د پاکستان سمندري ځواکونه "د سمندر د ګډ امنیت په مفکوره کلک باور لري."

هغه وويل، د پاکستان سمندري ځواکونه د ۲۰۰۴ کال څخه د نورو ملګرو د بحري ځواکونو سره په فعاله توګه د سمندري امنيت او د سمندري غلا پرضد عملياتو کې برخه اخلي.

د سي اېم اېف د وېب پاڼې له مخې، په ۲۰۰۴ کال کې، ​​پاکستان د متحده ایالاتو په مشرۍ د ګډو سمندري ځواکونو (سي اېم اېف) ​​سره یو ځای شو. ګډ سمندري ځواکونه د ۳۴ هېوادونو يو ایتلاف دی چې په لویو سمندرونو کې د غیرقانوني او غیر دولتي فعالینو سره د مبارزې له لارې "د نړېوالو قوانینو پر بنسټ د نظم ساتلو لپاره شتون لري."

سی ایم ایف "نږدې د ۸.۳ ملیونه کيلو متره مربعه نړېوالو اوبو" ساتنه کوي او په بحرین کې د متحده ایالاتو په بحري اډه کې موقعیت لري.

پاکستان د ګډ کاري ځواک (CTF) په څلورو کاري ځواک کې په دوو کې برخه اخلي: سي ټي اېف ۱۵۰، چې له خلیج څخه بهر سمندري امنیت خوندي کوي، او سي ټي اېف ۱۵۱، چې د سمندري ډاکوانو سره مبارزه کوي.

د پاکستان سمندري ځواک په عمان خلیج کې د فبرورۍ په میاشت کې په نړېوال سمندري مشق (IMX) ۲۰۲۲ کې برخه اخیستې وه.

د پاکستان د سمندري ځواکونو کمانډر وقار محمد د امریکا د مرکزي قوماندانۍ (د متحده آيالاتو سينټکوم) په یو بیان کې وویل، "IMX/CE [کلستر ايکسپريس] 2022 د نړۍ له ګوټ ګوټ څخه سمندري ځواکونو، سمندري سازمانونو او ټولنو ته یو ځانګړی فرصت برابر کړو چې د نړېوالو قوانینو پر بنسټ د نړېوال نظم ساتلو لپاره نړېوال عزم څرګند کړي."

بلګرامي وویل، "د ۲۰۱۸ کال راهیسې، د پاکستان سمندري ځواکونه سیمه ایز سمندري امنیتي ګشتونه هم ترسره کوي چې له لارې یې پاکستاني کښتۍ د هند سمندر په سیمه کې په مهمو سمندري سیمو کې شتون لري ترڅو زموږ د نړېوالو ژمنو سره سم په سمندر کې د ښه نظم په ساتلو کې مرسته وکړي."

هغه وویل، دا وروستی مشق به د روزنې یو لړ مشقونه ولري چې موخه یې د ترهګرۍ، سمندري غلا، مخدره توکو او وسلو قاچاق او د اقلیمي بدلون سره په مبارزه کې مرسته کول دي.

بلګرامي زیاته کړه، "د سمندرونو پراخوالی د هر هېواد لپاره دا خورا ستونزمن کوي چې یوازې د دې متنوع چيلنجونو سره مقابله وکړي."

د پاکستان او امریکا تر منځ سمندري همکاري

د امریکا سمندري ځواک، چې له ۲۰۰۷ کال راهیسې یې د امن په مشقونو کې برخه اخیستې، په وروستیو کلونو کې له پاکستان سره همکاري زیاته کړې ده.

د اکتوبر په میاشت کې،​ د متحده ایالاتو د ساحلي ساتونکو دوو بېړو​ -- USCGC چارلس مالتروپ او USCGC ايلمن تونل -- د متحده ایالاتو د پنځمې بیړۍ او د پاکستان د سمندري ځواکونو ترمنځ د ګډو مشقونو او تخنیکي تبادلو د روانې لړۍ د یوې برخې په توګه کراچۍ ته سفر وکړو.

د متحده ایالاتو د سمندري ځواکونو د مرکزي کمانډ لخوا د تېر اکتوبر په ۹مه په یو بيان کې ويل شوي، د متحده ایالاتو ساحل ساتونکي کښتۍ د متحده ایالاتو د پنځمې بیړۍ سره په مینځني ختیځ کې د سمندري امنیت او ثبات په یقیني کولو کې د مرستې لپاره ځای په ځای شوې.

د متحده ایالاتو د پنځمې بیړۍ د عملیاتو ساحه نږدې ۶.۵ ملیونه مربعه کیلومتره اوبه لري او د عرب خلیج، د عمان خلیج، سور بحر او د هند بحر ځینې برخې پکې شاملې دي. په دغه ساحه کې ۲۰ هېوادونه شامل دي او د هرمز تنګي، سویز کانال او د یمن په جنوبي څنډه کې په باب المندب تنګي کې درې مهم ځايونه شامل دي.

د متحده ایالاتو ساحل ساتونکي کیپټن ایرک هیلګن، چې د سویل لویدیځ آسیا د ګشت کونکو ځواکونو کموډور دی، په هغه وخت کې وویل، د بندر لیدنه "د پاکستان سمندري ځواک او د متحده ایالاتو د پنځمې بیړۍ ترمنځ قوي ملګرتیا" په ګوته کوي.

هیلګن وویل، "زموږ اړیکې پیاوړې او تلپاتې دي، چې د همغږۍ او همکارۍ د زیاتولو لپاره د کارمندانو د تبادلې او ګډ مشقونو پر بنسټ ولاړې دي."

په نورو کښتیو کې چې تېر کال يې د کراچۍ بندر ته سفرونه کړې ول يو اېس اېس ګريډلي، چې د ارلیګ برک کلاس لارښود توغندي ویجاړونکي بيړۍ ده، او يو اېس اېس سکوال او يو اېس اېس ورلوينډ ګزمې کښتۍ شاملې وې.

په وروستیو میاشتو کې پاکستان ته ​د امریکا د سينټکوم د مشر​ او د امریکا د هوايي ځواک ​د یو لوړپوړي افسر سفرونه​ هم د دواړو هېوادونو د پوځونو ترمنځ د مخ پر ودې اړیکو ثبوت دی.