امریکا پاکستان ته د اورپکۍ پر ضد د مبارزې او د پاک افغان پولې په امنیت کې د مرستې وړاندیز کوي

امنیتي شنونکي او د مدني ټولنې فعالان وايي، د پاکستان او متحده ایالاتو ترمنځ امنیتي همکاري به د تحریک طالبان پاکستان (ټي ټي پي) او په سیمه کې نورې نړېوالې اورپکې ډلې کمزورې کړي.

د پاکستان د ملي امنیت کمیټۍ (اېن اېس سي)، چې د ملي امنیت په اړه د بحث لپاره د هېواد ترټولو لوړ ملکي-پوځي فورم دی، د دسمبر په ۳۰مه او د جنورۍ په ۲مه غونډه وکړه ترڅو د هغه ترهګریزو بریدونو د وروستي زیاتوالي ارزونه وکړي چې منع شوي ټي ټي پي يې ادعا کړې ده.

د ملي امنیت شورا په غونډه کې ګډون کوونکو، چې پکې وزير اعظم شهباز شریف او د پوځ مشر جنرل عاصم منیر هم شامل وو، په هېواد کې دننه د ترهګرو ډلو د ځپلو لپاره خپله اراده تکرار کړه.

د ملي امنیت شورا له کابله غوښتي چې په خپله خاوره کې د پاکستاني ترهګرو ډلو ته خوندي پټنځایونه ورنکړي او د هغوی له ملاتړه لاس واخلي.

د جنورۍ په میاشت کې د پاکستان د ملي امنیت شورا له غونډې یوه ورځ وروسته، واشنګټن د ترهګرۍ پر ضد د اسلام آباد د پرېکړو لپاره د خپل ملاتړ اعلان وکړو.

د امریکا د بهرنیو چارو وزارت ویاند نیډ پرائس د جنورۍ په ۳مه یوې خبري غونډې ته د وینا پر مهال وویل، "د پاکستان خلک د تروریستي بریدونو له امله ډېر زیانمن شوي دي. پاکستان حق لري چې له ترهګرۍ څخه د ځان دفاع وکړي."

پرائس وویل، متحده ایالات پر کابل غږ کوي چې خپله پخوانۍ ژمنه پوره کړي چې "د افغانستان خاوره به بیا د نړېوالو تروریستي بریدونو د مرکز په توګه ونه کارول شي".

ټي ټي پي له هغه راهیسې په پاکستان کې خپلو بریدونو ته زور ورکړی دی​​کله چې د نومبر په وروستیو کې له اسلام آباد سره د يو څو میاشتو کمزوری اوربند پای ته ورسیدو​​.

د ټي ټي پي یو ځانمرګي بریدګر د دسمبر په ۲۳مه په اسلام آباد کې د استوګنې سیمې ته څېرمه خپل له چاودېدونکو توکو ډک موټر ته چاودنه ورکړه، چې له امله یې یو پولیس افسر او د راپورونو له مخې لږ تر لږه ۱۰ ملکي وګړي ووژل شول.

تر دې مخکې د دسمبر په ۱۸مه، د ټي ټي پي وسله والو د خیبر پښتونخوا صوبې په بنو ضلعه کې د ترهګرۍ ضد یو مرکز ونیولو چې په نتیجه کې یې د یرغمل حالت رامنځته کړو.

حکومتي ځواکونو درې ورځې وروسته دغه مرکز بېرته ونیولو او ټول ۳۳ ترهګر یې ووژل. د ځانګړو ځواکونو دوه تنه غړي ووژل شول.

د متحده ایالاتو د بې پیلوټه الوتکو په بریدونو او داخلي اختلافاتو کې د ټي ټي پي د مشرانو مرګونو د ۲۰۲۰ کال د پېل پورې تحريک طالبان پاکستان کمزوری کړو، خو په افغانستان کې د ۲۰۲۱ د اګست راهیسې د ناراضه ډلو يو ځای کېدو او تازه پيښو دا ډله بیا پیاوړې کړه.

د دوی جنګیالي په لویه کچه له پاکستان څخه ګاونډي افغانستان ته وروسته له هغې وشړل شول کله چې​​په ۲۰۱۴ کال کې ضرب عضب عملیات پېل شول​​.

پاکستان، امریکا او​​ملګرو ملتونو تحریک طالبان پاکستان يوه ترهګره ډله ګرځولی ده​​.

د امریکا او پاکستان ترمنځ همکاري وده کوي

امنیتي شنونکي وايي، د واشنګټن وروستي اقدامات، لکه د دسمبر په نیمایي کې د امریکا د مرکزي قوماندانۍ (سېنټکوم) مشر جنرل مایکل "ایرک" کوریلا پاکستان ته سفر او د پاک افغان پولې د امنیت لپاره د بودیجې تخصیص د دواړو هېوادونو ترمنځ د امنیت په برخه کې د چټکتیا ښودنه کوي.

سېنټکوم د دسمبر په ۱۶مه په یو بیان کې وویل، کوریلا او د پاکستان لوړ پوړو پوځي مشرانو، د منیر په ګډون، د "امنیتي همکارۍ، د افغانستان او پاکستان پولې په اوږدو کې د امنیت، په سیمه کې د ترهګرو ډلو لخوا د ګواښ، روانو عملیاتو او د سېنټکوم او د پاکستان پوځ ترمنځ د همکارۍ زیاتولو فرصتونو په اړه خبرې وکړې."

کوريلا پېښور ته سفر وکړو او د يولسم کورپس له مرکزي دفتر څخه يې ليدنه وکړه، چې د خيبر پښتونخوا صوبې ته ځانګړې شوې او له افغانستان سره د شاوخوا نيمايي پولې مسووليت لري.

سېنټکوم وویل، هغه او د يولسم کورپس مشران په چورلکو کې د بیګ بین پوسټ ته پرواز وکړو چې د خیبر د لارې څخه يې لیدنه وکړه، چېرې چې دوی "د پولې د امنیت څېړنه وکړه او په افغانستان کې د ترهګرو ډلو د پولې هاخوا د فعالیت په اړه یې بحث وکړو."

دا په څلورو میاشتو کې پاکستان ته د کوریلا دویم سفر دی.

په پېښور کې د ترهګرۍ ضد د پولیسو یو جګپوړي چارواکي وویل، "د جنرل کوریلا سفر ښیي چې متحده ایالات په پاکستان کې د تروریستي ډلو، لکه ټي ټي پي او د بین المللي ډلو سیمه ایزې څانګې لکه په برصغیر هند کې القاعده (آقس) او 'اسلامي دولت' -- د خراسان صوبې (ISKP)"، لخوا د امنیتي وضعیت د خرابیدو په اړه اندېښنه لري.

د دسمبر په لومړۍ نېټه،​ امریکا د تحریک طالبان پاکستان مرستیال مشر او د دې تش په نامه پوځي کمیسیون مشر قاري امجد​ او د آقس د نورو درېو پاکستاني مشرانو سره یو ځای د ترهګرۍ په لېست کې شامل کړو.

د پولیسو یو چارواکي، چې د اجازې نه لرلو له کبله یې د نوم نه ښودلو په شرط له رسنیو سره خبرې وکړې، وویل، "د متحده ایالاتو مرسته، په ځانګړې توګه د استخباراتو په شریکولو کې د پاکستان، چې د نغدو پيسو له کمي سره مخ دی، د ترهګرۍ ضد عملیاتو لپاره خورا مهمه ده."

هغه وويل، "د دواړو هېوادونو تر منځ د امنیتي همکارۍ له امله، ټي ټي پي په لویه کچه وروسته له هغې کمزورې شوه کله چې د امریکا بې پیلوټه الوتکو په بریدونو کې ... د دغه ترهګرې ډلې مشر​​بیت الله محسود​​د ۲۰۰۹ کال په اګست کې​​او ملا فضل الله​​د ۲۰۱۸ کال په جون کې ووژلو."

د تحريک طالبان پاکستان په وروستي لیک کې د ډرون بریدونو اندیښنو له امله عام وسله وال د ټي ټي پي مشر مفتي نور ولي سره له لیدو څخه منع کړل، چې د پاکستان او امریکا د امنیتي همکارۍ یو اثر دی.

تحريک طالبان پاکستان تېره چهارشنبه (د جنورۍ په ۴مه) هم د پاکستان په سیاسي مشرتابه باندې د بریدونو پېلولو ګواښ وکړو، او په ښکاره توګه يې د شریف او د بهرنیو چارو وزیر بلاول بوټو زرداري نومونه واخيستل ځکه چې دوی د متحده ایالاتو د "خوشحالولو" لپاره د دغه ترهګرې ډلې پر وړاندې مبارزه وکړه.

همکاري وستایل شوه

د ترهګرۍ قربانیانو او د مدني ټولنې فعالانو هم د پاکستان د حکومت لخوا د ټي ټي پي د ځپلو پریکړه او د ترهګرۍ ضد هڅو کې د امریکا لخوا د وړاندیز شوي ملاتړ ستاینه یې وکړه.

" فاتح جوزف، چې د مسیحي مدني ټولنې فعال دی، او ​​د ۲۰۱۳ کال په سپتمبر کې په پېښور کې يې د آل سېنټ کلیسا په یو ځانمرګي برید کې دوه خپلوان له لاسه ورکړي ول، وويل،د ټي ټي پي سره خبرو اترو د ترهګرۍ تنظیم هڅولی دی. د پاکستان ملت د حکومت د هغې پریکړې ملاتړ کوي چې د ټي ټي پي په وړاندې د ترهګرۍ ضد عملیات پېل کړي."

ډان ورځپاڼې د دسمبر په ۹مه راپور ورکړو، د دسمبر په مياشت کې، د ترهګرۍ ضد ملي ادارې (نېکټا) په یو راپور کې، چې د کورنیو چارو په اړه د سېنېټ سټينډنګ کمیټې ته وړاندې شوی و، د ټي ټي پي سره د سولې خبرې اترې هم تورنې کړې چې په ټول هېواد کې يې په ترهګرۍ کې زیاتوالی راوستی دی.

جوزف د واشنګټن د مرستو هرکلى وکړو او له نورو هېوادونو څخه يې وغوښتل چې د ترهګرۍ ضد هڅو کې د پاکستان ملاتړ وکړي.

هغه وویل، "ټي ټي پي او د هغې متحدې نړېوالې ډلې نه یوازې د پاکستان بلکې ټولې نړۍ لپاره یو امنیتي ګواښ دی."