د قبایلي ځوانانو پروژه د تعلیم له لارې د افراطیت سره د مبارزې لپاره مرستې ترلاسه کوي

خار، باجوړ ضلعه -- د خېبر پښتونخواه يوه ټولنیزه فلاحي ډله هڅه کوي چې قبایلي ځوانانو ته د بنياد پرستۍ او افراطیت د خطرو په اړه تعليم ورکړي چې د متحده ایالاتو لخوا تمویل شوي د سولې سازمان نه يې مرسته ترلاسه کړې ده.

يو ايس آی پي د اکتوبر په ۲۲ مه په یو بیان کې وويل، د متحده ایالاتو د سولې انسټیټیوټ (يو ايس آی پي)، چې موخه یې په نړۍ کې د سیمه ایزو همکارانو سره مرسته کول دي چې د تاوتریخوالي د شخړو مخه ونيسي، کمې يې کړي او حل يې کړي، خادم الخلق فاونډېشن (کی کی اېف) ته "د انتقادي فکر کولو له لارې سولې ته د وده ورکولو" پروژې لپاره مرستې چمتو کړې.

کی کی اېف د يو ايس آی پي په لومړي یوت اېنډ پیس بلډنګ ګرانټس کمپیټیټیشن په ګټونکې کې وه، چې دغه سیالي د جنرېشن چېنج فیلوز پروګرام د غړو ترمنځ ترسره شوې وه.

يو ايس آی پي په یو بیان کې وویل، د دې سیالۍ موخه په نتقيدي توګه د سولې راوستلو د نوښتونو شمیر او کچه لوړول دي چې ځوانان يې رهبري کوي او په ځوانانو تمرکز کوي.

کی کی اېف په خېبر ضلعه کې د ځوانو مدني مشرانو لخوا په ۲۰۱۲ کال کې په سیمه کې د افراطیت او طالبانو د راپورته کيدو خلاف جوړه شوې وه.

يو ايس آی پي وويل، "د سلګونو رضاکارانه غړو د انرژۍ له لارې، کی کی اېف د پاکستان د زده کړې په ملي نصاب کې د سولې تعلیم ضم کولو لپاره کار کوي."

دې زیاته کړه، "يو ايس آی پي ګرانټ يو پروګرام تمويلوي چې په خېبر ضلعه کې دغه ضم کيدل ترلاسه کړي. خېبر ضلعه د افغانستان د پولې په اوږدو کې یوه ستراتیژیکي سیمه ده چیرې چې افراطي سازمانونه ځوانان د غړو په توګه ګماري. دا نصاب به په ځوانانو کې د انتقادي فکر کولو مهارتونه لوړ کړي او پدې توګه به د تاوتریخوالي بیانونو اغیزمنتوب راکم کړي چې دا ډول ډلې يې د ګمارلو لپاره کاروي."

د کی کی اېف چيرمين محمد فاروق افریدي وویل، کی کی اېف د کمزوري ځوانانو لپاره تعلیمي خلا ډکوي.

هغه د نومبر په ۱۹ مه وویل، "د پاکستان په قبایلي سیمو کې د ترهګرۍ په وړاندې د یوې عشرې اوږدې جګړې ثابته کړې چې زموږ تعلیمي ادارې محدود تعلیم چمتو کوي، په معاصر تعلیم باندې خورا لږ یا هیڅ ټینګار نه کوي، او د انتقادي فکر کولو مهارتونه جوړول نه لري."

د دې نه علاوه، تعلیم "د شخړې هوارولو او اعتماد جوړولو په اړه بحثونه نه لري، د بیان لږه ازادي لري او د کثرتيت او ګډ ژوند په اړه هیڅ تعلیمات نه لري." "دا زده کونکي د افراطي او بنياد پرستۍ افکارونو د خطر سره مخامخ کوي."

افریدي وویل، "د سولې د ترلاسه کولو لپاره، زموږ ځوانان د انتقادي فکر کولو د تیارولو، خپل اعتماد پیاوړي کولو او ځوانانو ته د سولې په اړه د پوهې او شعور ورکولو لپاره، موږ له پکار ده چې پراخه او جامع روزنیز پروګرام معرفي کړو چې دا خلا ډکه کړي."

هغه وويل، دا نوښت موخه لري چې د هایي سکول زده کونکو سره مرسته وکړي چې توان ترلاسه کړي چې د انتقادي فکر کولو مهارتونو له لارې د افراطي افکارونو سره مبارزه وکړي. کی کی اېف به د دې پروژې لاندې د اتم، نهم او لسم ټولګیو لپاره د یوې هفتې کورس ښيي.

دغه نوښت د باجوړ ضلعې د تعليم د دفتر ملاتړ لري. افریدي وویل چې کی کی اېف به د پروژې په پلي کولو کې د تعليم له دفتر سره نږدې کار وکړي، او زیاته یې کړه چې دا به د ۱۰ مختلفو سکولونو ۳۰ ځوان زده کونکي وروزي.

هغه وویل، ښځینه زده کونکي به په خېبر ضلعه کې د ټول هدفي ګروپ ۳۰٪ برخه وي.

د سولې د ودې پیښې

کی کی اېف په منظم ډول پروګرامونه کوي چې د سولې په اړتيا باندې ټینګار وکړي.

د سپتمبر په مياشت کې، دې په خېبر قبایلي ضلعه کې په خېبر پبلک سکول او کالج باړه کې د ۲۰۱۹ د سولې نړیوالې ورځې په موقعه "د سولې لپاره د اقليم عمل" په نامه د نقاشۍ د سيالۍ انتظام وکړو.

نږدې ۲۰ د سکول زده کونکو د نقاشۍ په سیالۍ کې برخه واخیسته، چې دوی پکې د سولې او د اقلیم د عمل په اړه انځورونه جوړ کړل.

د کی کی اېف جنرل سيکريټري احمد شاه وویل، "د دې پروګرام مقصد دا وو چې د سولې اهمیت روښانه کړي او په سیمه کې د شخړو/ تاوتریخوالي مخه ونيسي. دلته زموږ په سیمه کې، اوسیدونکي د تاوتریخوالي او افراطیت له کبله ځپل شوي ول، او موږ غواړو چې د افراطي افکارو مخه ونیسو او خپل ځوانان د سولې په نوښتونو کې ښکیل کړو."

اصغر خان، چې د خېبر پبلک سکول او کالج باړه پرنسپل دی، وويل، "که چیرې دوی ته مناسب پلیټفارم ورکړل شي، نو زموږ ځوانان د دې توان لري چې د سولې او پرمختګ په پروسه کې برخه واخلي."

کی کی اېف په جولای ۲۰۱۶ کال کې د پخوانۍ فاټا د ځوانانو او مشرانو لپاره د "کثرتيت او ګډ ژوند" په اړه د يو کانفرنس انعقاد وکړو. د عیسایانو، مسلمانانو، هندوانو او سکانو ټولنو غړو په پیښور کې په دغه غونډه کې ګډون وکړو.

د کی کی اېف چيرمين افریدي وویل، نړۍ یو نړیوال کلی دی چیرې چې هر کس پر بل کس تکيه لري او چیرې چې د مذهبي ډلې لپاره دا ناممکنه ده چې جلا ژوند وکړي.

هغه زیاته کړه، "موږ هڅه کوو چې د جګړو په ځپلو شويو سیمو کې غوره ټولنه جوړه کړو." "موږ اتحاد او داسې ټولنه غواړو چیرې چې هرڅوک د آزادۍ احساس وکړي او خپل نظرونه او افکار شریک کړي."