چارواکي په باجوړ کې د وژونکي مارټر برید له کبله افغان وسله وال غندي

خار، باجوړ -- چارواکو وويل، د یکشنبې په ورځ (د فبرورۍ په ۲ مه) د مارټر يوه ګولۍ، چې د افغانستان نه ويشتل شوې وه، د افغانستان او پاکستان پولې ته څېرمه په باجوړ ضلعه کې په یو کور ولګېده، چې د یوې کورنۍ اووه غړي يې ووژل.

د پوليسو يو لوړ پوړي چارواکي ګلزار خان ای اېف پي ته وويل، "له افغانستان څخه ويشتل شوي د مارټر ګولۍ د ځایي کلي اوسیدونکي فضل غني په کور ولګیده. هغه د هغه مېرمن او د کورنۍ پنځه نور غړي په ځای مړه شول."

په مړو شويو کسانو کې درې میرمنې، درې ماشومان او د کورنۍ مشر شامل وو.

دا پیښه د باجوړ په بټوار بنګړو کلي کې رامنځته شوه، چې د باجوړ ضلعې مرکزي ښار خار نه نږدې ۵۰ کلومتره لرې دی.

خان وویل، پولیسو او د ژغورنې چارواکو د کلیوالو سره د مړيو په راويستلو کې مرسته وکړه کله چې هغوی سیمې ته ورسیدل.

خان وويل، "کور تباه شوی و."

په سیمه کې یو لوړ پوړي دولتي چارواکي انور الحق د پیښې او د مړيو د شمیر تایید وکړو او ویې ویل چې د مارټر ګوله د پولې هاخوا په افغانستان کې د کونړ صوبې څخه توغول شوي وه.

حق وویل، چې دغه ګولۍ د کور چت راوغورځولو او د کورنۍ غړي یې ووژل.

یو امنیتي چارواکي د نوم نه ښودلو په شرط وویل، "وسله والو له افغانستان څخه مارټر ګولۍ وتوغله، چې د ماښام په ۴.۱۵ بجې د فضل غني په کور ولګیده."

دغه چارواکي وویل، چې د افغانستان په کونړ صوبه کې میشتو وسله والو په تیرو څو کلونو کې د پاکستان په خاوره باندې بریدونه کړي او دوی نه یوازې بې ګناه ملکي وګړي ... بلکې امنیتي ځواکونه هم په نښه کوي.

د شمالي پاکستان د پوځ سيکټور کمانډر بريګيډير غلام محمد ملک د دوشنبې په ورځ (د فبرورۍ په ۳ مه) د پيښې د ځای ليدنه وکړه.

په داسې حال کې چې غلام د قربانيانو د کورنۍ د غړيو سره خپله خواخوږي څرګندوله، هغه وويل، "زه د وسله والو د دې عمل په کلکه غندنه کوم چې بې ګناه خلک يې په نښه کړو، او موږ به د بې وزله کورنۍ کور بيرته جوړ کړو." هغه زیاته کړه چې د غني زوی به د دولتي دندې لپاره استخدام شي.

له باجوړ څخه د خېبر پښتونخواه اسمبلۍ غړي انور زیب خان، چې د بمبارۍ غندنه یې وکړه، وویل چې "د وسله والو دا ډول بریدونه د پاکستان او افغانستان ترمنځ اړیکو ته زيان رسوي."

هغه وويل، "پرون ما د خېبر پښتونخواه وزیر اعلی محمود خان ته ټيلي فون وکړو، او هغه د هر يو لپاره د ۵۰۰،۰۰۰ روپیو (۳،۲۰۰ امريکايي ډالرو) اعلان کړی دی. هغه دغه برید غندلی دی.

اسلام آباد تیره هفته د تورخم پوله وروسته له هغې د لږ وخت لپاره وتړل شوه کله چې له افغانستان څخه مارټر ګولۍ په پاکستان کې راپريوته او څه زيان يې رامنځته نه کړو.

[د باجوړ څخه حنیف الله د دې راپور په برابرولو کې مرسته کړې.]