پاکستاني ملېشې په سوريه کې د نشه يي توکو په جګړه کې ښکېل دي

بیروت -- په دې میاشت کې، د دمشق په جنوب کې د سیده زینب په زیارت کې د خپلمنځي تاوتریخوالي په وروستي پړاو کې د اسلامي انقلابي ګارډ قول اردو (آی آر جي سي) پورې تړلو ملېشو ترمنځ مرګونې نښتې رامنځته شوې.

د سوریې د اپوزیسیون رسنۍ صوت العاصمه (د پلازمینې غږ) راپور ورکړو چې د مۍ په ۷مه ګڼ شمېر ملېشې ووژل شوې کله چې د آی آر جي سي د دوو ملېشو سره وابسته ایرانيان، افغانان او پاکستانيان په خپل منځ کې په جګړه کې بوخت شول.

د صوت العاصمه سیمه ایز مشر مدیر احمد عبید المشارق ته وویل، د لنډې او تاوتریخجنې نښتې په ترڅ کې چې شاوخوا نیم ساعت یې دوام وکړو، د غیر سوریي ملېشې اوه غړي ووژل شول.

هغه وويل، په ياده نښه کې يوې اوه کلنې جينۍ خپل ژوند له لاسه ورکړو او ١٣ نور ملکي وګړي ژوبل شول.

دغه رسنۍ راپور ورکړو، هغه تاوتریخوالی چې د دغه پیښې لامل شو د آی آر جي سي سره د تړلو دوو ډلو ترمنځ د مخدره توکو د پلور په سر شخړه وه.

په دغه راپور کې ویل شوي چې یوې ډلې د بلې ډلې "سیمه" ونيوله او هلته یې نشه یي توکي وپلورلې، چې وروسته د جګړې لامل شوه.

صوت العاصمه راپور ورکړو چې د فبرورۍ په میاشت کې په همدې سیمه کې د عراقي سیلانیانو او ځایي اوسیدونکو د یوې ډلې تر منځ نښتې رامنځته شوې.

څارونکو وويل، شخړه هغه مهال رامنځته شوه کله چې عراقي سیلانیانو په سیمه کې د خوراکي توکو مرستې د ویشلو پر مهال د ځینو اوسیدونکو سپکاوی وکړو.

د دمشق اوسېدونکي وايي، د سیده زینب سیمه د ایران په ملاتړ ملېشې کنټرولوي، او دا یې د "بیروت جنوبي ښارګوټي" په څېر په یو ښارګوټي کې بدله کړې ده. بيروت د لبنان د حزب الله تاریخي مرکز دی.

د دمشق بې قانونه سیمه

د سوریې فعالانو المشارق ته وویل چې حزب الله سوریې ته په پراخه کچه مخدره توکې قاچاق کوي. هغوی یادونه وکړه چې د دمشق شاوخوا سیمې د دغه ګوند د لبنان له مرکزونو سره، چې د غیرقانوني فعالیتونو په لحاظ سره هلته کې دوام لري، ورته والی لري.

عبید وویل، د سیده زینب سیمه د آی آر جي سي او د سوریې د رژیم تر کنټرول لاندې ده.

هغه وويل، په سيمه کې ايراني، افغان، پاکستاني، عراقي او د لبنان حزب الله ملېشې شتون لري، چې په سکټورونو وېشل شوې دي. هغه زياته کړه چې هرې ملېشې ته "اجازه" ورکړل شوې چې په خپل سکتور کې د نشه يي توکو له مخکې نه ټاکل شوی مقدار وپلوري.

هغه وويل، د سيده زينب په سيمه او د آی آر جي سي تر کنټرول لاندې نورو سيمو کې د نشه يي توکو کاروبار "د ملېشو د عناصرو تر منځ په پراخه کچه روان دی، چې ګټه يې له خپلو قوماندانانو سره شريکوي."

عبید وویل چې د سیده زینب سیمه د بیروت د سویلي ښارګوټي په څېر بې قانونه شوې ده، پداسې حال کې چې په دغه سيمه کې د سني سوریاییانو، عراقیانو او د فوع، کفرایا، النبل او الزهرا د شیعه ډلو ډېر نفوس شتون لري.

هغه وويل، "له بده مرغه، ملېشې هلته او په دمشق کې او د هغې په کليوالو سيمو کې په ښکاره توګه د نشه يي توکو کاروبار کوي، چېرته چې دا د قهوې او چای په هټيو کې پلورل کيږي."

هغه د دمشق په سویل کې د مخدره توکو په پلور کې د پام وړ زیاتوالی د آی آر جي سي او حزب الله د تمویل کمي ته منسوب کړو، ځکه چې دواړه د مالي ملاتړ لپاره په ایران تکیه کوي او دا چې ایران د اقتصادي بحران سره مخ دی.

د آی آر جي سي سره تړلو ملېشو ترمنځ نښته شوې

د سوریې د یو خبریال او فعال په وینا چې نه یې غوښتل نوم یې ښکاره شي، حزب الله د دمشق سیمې ته په زیاته اندازه نشه یي توکي، په ځانګړې توګه چرس او اسیټل فنټینایل، چې په عام ډول د "جعلي هیروینو" په نوم یادیږي، قاچاق کوي.

هغه وويل، نشه يي توکي د سيده زينب په سيمه کې پلورل کېږي، چې دا د نشه يي توکو په يو بدنام بازار بدل شوى دى.

هغه وویل، کله ناکله د حزب الله عناصرو او د سوریې د پوځ د څلورم ډويژن ترمنځ د ګټو د فیصدي په سر نښتې رامنځته کیږي، ځکه چې څلورم ډويژن په پلور کې د مرستې په بدل کې د زیاتې ونډې غوښتنه کوي.

د دیر ايزور یو فعال چې د "خالد" په نوم یادیږي وویل، د ایران په ملاتړ د ملېشو ترمنځ نښتې "د فرات په څنډه کې د پوستونو د کنټرول سره تړاو لري".

هغه وویل، په دې وروستیو کې د مهکن په ښارګوټي کې د رژیم پلوه ملي دفاعي ځواکونو ملېشو او د فاطمیون ډويژن، چې له افغان جنګیالیو څخه جوړه ده، د غړو ترمنځ د یوې وسله والې نښتې راپور ورکړل شو.

هغه وویل، د اپرېل په لومړیو کې، د البو کمال په دیر ايزور سرحدي ښارګوټي کې هغه مهال نښتې پېل شوې کله چې د آی آر جي سي سره تړلې لیوا الشیخ ملېشې د لیوا ابو الفضل العباس د یو موټر د لټولو هڅه وکړه.

خالد وویل، جګړې د ابو الفضل العباس یو عنصر ووژلو، اوه نور ملېشه غړي او ګڼ شمېر ملکي وګړي ژوبل شول او نږدې کورونو ته یې زیان ورسولو.

هغه وويل د البو کمال په کلي کې د "شنه کمربند" سيمه د آی آر جي سي د ۱۴۷م بريګيډ د عناصرو او د ايران پلوه عراقي ملېشو ترمنځ د وسله والو نښتو ډګر پاتې شوی دی.