شي په کور دننه جګړې ته لمن وهي، په داسې حال کې چې د چین پوځ په بهر کې جارحيت ته وده ورکوي

بيجينګ -- د چین صدر شي جینپینګ په عامه بيانونو کې جارحانه الفاظ کاروي، په داسې حال کې چې په ورته وخت کې چینایي پوځ ډیر جارحانه چلند کاروي او د نورو خپلواکه هیوادونو په خاوره کې بريدونه ترسره کوي -- چې دا یو داسې رجحان دی چې د ګاونډيو هیوادونو، څارونکو او د نړیوالې ټولنې د اړوندو غړيو لپاره يوه اندیښنه ده.

شي په وروستیو اوونیو کې احتمالي "بریدګرو" ته سخت خبرداری ورکړی، او د ټولو تیري کونکو په وړاندې د "نوې چین" د ساتنې لپاره یې د بیجینګ د پوځي هوډ ستاينه وکړه.

د اکتوبر په ۲۳ مه په یوې مهمه وروستۍ وینا کې، شي وویل چې جګړه باید د بريد د مخنيوي لپاره وشي او تاوتریخوالی باید له تاوتريخوالي سره مخ شي.

دغه وينا د کوریا په جګړه کې د چین د داخلېدو اويايمه کلیزه ولمانځله -- چې چینايي او امریکایي ځواکونو په مستقیمه توګه په دې یوازینی جنګ کړی دی.

دغه جګړه، چې يو هيواد پکې هم نه و بريالی شوی، په چین کې د یو بریا او د یو پرمختللي دښمن په وړاندې د مقاومت او جذبې د مثال په توګه ستايل شوې ده.

په یوې اوږده وینا کې، چې د وطن پرستۍ او د چینايي ځواکونو د اتلولۍ د داستانونو څخه ډکه وه، شي وویل چې د ۱۹۵۰-۵۳ په شخړه کې "بریا" یوه یادونه ده چې د هغه ملت د هرهغه چا سره د مبارزې لپاره چمتو دی چې "د چین په دروازه کې ... ستونزې رامينځته کوي".

شي د لاس پړکولو په دوران کې وويل، "د چینایي خلک ستونزې نه رامینځته کوي، او نه هم موږ له دوی څخه ویره لرو."

"موږ به هیڅکله په آرام سره ناست پاتې نه شو چې خپل ملي حاکمیت ته زیان رسول وينو ... او هیڅ یو ځواک ته به دا اجازه ورنه کړو چې زمونږ د هيواد په مقدسه خاوره باندې برید وکړي او تقسيم يې کړي."

له خپلو ګاونډیو سره په شخړه کې د ښکیل کيدو لپاره د بیجینګ د مخ په زیاتیدونکې لیوالتیا سره، شي وویل چې "د تسلط تعقیب یا ځورونه هيڅ پايله نه لري".

د جګړې جذبه رامينځته کول

چینایي رژیم د خپلو ځواکونو اويايمه کلیزه زياتره په جګړه کې د بوخت کيدو لپاره استعمال کړه -- چې موخه يې زياتره د کورني استعمال لپاره وه ځکه چې دا د هغې د لویو قدرتونو او ګاونډیو لپاره یو خبرداری دی.

د چین دولتي رسنیو د کلیزې هفتې په دوران کې د پروپيګنډې څپې خپرې کړې، چې په ځانګړې وخت کې به يې د هغه چينايي سرتيرو سره روزانه مرکې کولې چې له جګړې څخه ژوندي پاتې شوي وو.

د ايکشن نه ډک "قرباني" فلم، چې په چینايي سینيما کې د دریو لویو کسانو لخوا جوړ شوی او د چینايي عسکرو یوه کوچنۍ ډله ښيي چې د جګړې په وروستیو ورځو کې بهرني ځواکونو ته ماتې ورکوي، د اکتوبر په ۲۳ مه په ټول هیواد کې په سینيما ګانو کې وښودل شو.

شنونکي وايي چې د جګړې د کلیزې په اړه شور او غوغا د شي د وطن پرستۍ کمپاين یوه برخه ده چې یو ځل ضعیف چین بیرته په نړۍ کې د خپلې واکمنۍ مناسب ځای ته ورسوي.

ايلس ايکمېن، چې د امنیتي مطالعاتو لپاره د اروپایي اتحادیې په انسټیټوټ کې د چین کارپوه دی، د دغه وینا څخه مخکې وويل، "شي په پراخه کچه د جګړې جذبه رامينځته کوي."

د تایوان په تنګي کې، د کینمن ټاپو په ساحلونو کې د ټينکونو لټونه یوه بشپړه یادونه ده چې تائیوان د چینايي يرغل تر پرله پسې ګواښ لاندې ژوند کوي -- او د شخړې ویره اوس په لسیزو کې تر ټولو لوړه ده.

جمهوري تائیوان په دې پوهه شوی چې د بیجینګ د استبدادي مشرانو په اخطارونو سره ژوند وکړي چې دوی چمتو دي او غواړي چې هغه ځای قبضه کړي چې دا يې د خپلې سیمې يوه برخه ګڼي.

خو د دې تر شا ارقام داسې کچې ته رسيدلي چې له پامه غورځول يې ګران دي، چې په دې وروستيو کې چینايي جیټ الوتکې اوس په لوړه کچه د تائیوان د دفاعي زون څخه تيريږي او د خلکو د آزادۍ پوځ په ټاپو کې د جعلي بريدونو پروپيګنډه خپروي -- او حتی په ګوام کې د متحده آيالاتو په اډو باندې بريدونه کوي.

د تاییوان کالج يو نوي زده کونکي وانګ جو شینګ وویل، "چین تایوان ته غوسه دی او ډیر وحشيانه عمل کوي."

متحده ایالاتو د اکتوبر په ۲۱ مه اعلان وکړو چې دې موافقه کړې وه چې دا به د ۱ ملیارده ډالرو څخه ډیر ارزښت لرونکي توغندي خرڅ کړي او له تائیوان سره د چینایي برید پروړاندې په دفاع کولو کې به مرسته وکړي او د اکتوبر په ۲۷ مه يې د ۲.۴ ميليارده ډالرو د ۱۰۰ هارپون ساحلي دفاعي سیسټمونو خرڅولو منظوري ورکړه.

يو نړیوال ځورونکی

چینایي رژیم له کلونو راهیسې د ګڼ شمیر هیوادونو لخوا د ستراتیژیکي ګواښ په توګه ګڼل کیږي، په دې وروستیو کې، که څه هم، په ټوله نړۍ کې د بیجینګ د عملونو اغیزې د خطر کچه لوړه کړې ده. .

د هانګ کانګ وروستې برتانوي ګورنر کریس پېټین د جولای په ۸ مه وویل، "له هندوستان څخه جاپان ... آسترالیا، کاناډا پورې، چینایان په ټوله نړۍ کې خپله اجنډه پر مخ بوځي."

هغه په هانګ کانګ کې د بیجینګ متنازعه امنيتي قانون، چې په مؤثره توګه یې د دغه ښار منل شوې خپلواکي او د جمهوريت دودونه پای ته ورسول، عملي کولو ته اشاره وکړه او ويې ويل، "په هانګ کانګ کې چې څه پیښ شوي د چين د کمونسټ ګوند لخوا د ترسره شويو اقداماتو د پراخه لړۍ يوه برخه ده، چې له دې حقیقت څخه ګټه پورته کوي چې موږ ټول له کورونا ویروس سره په مبارزه باندې خورا تمرکز کوو."

چینايي جارحيت ګاونډي هند ته غځیدلی دی.

د جون په منځ کې، چینایان او هندي عسکر د لداخ په سیمه کې له یو بل سره په سخته لاسي جګړه کې ښکېل شول، چې ۲۰ هندي سرتیري پکې ووژل شول. د چین رژیم تلفات ومنل خو هیڅ ارقام یې نه دي په ډاګه کړي.

په دغه وخت د هند د بهرنیو چارو د وزارت ویاند انوراګ سریواستووا وويل، دا نښتې د پولې هاخوا د چینایانو لخوا په یو اړخیزه توګه په پوله باندې د وضعیت د بدلولو لپاره د هڅو له کبله رامینځته شوې.

له هغه وخته راهیسې، دواړو هیوادونو غرنۍ پولې ته په زرهاو اضافي سرتیري استولي دي.

د سپتمبر په پیل کې، په ۴۵ کالو کې په لومړي ځل په دغه پوله ډزې وشوې. دواړو لورو په یو بل د ډزو کولو تور ولګوو.

د چين په شین جانګ سیمه کې دننه، له یو ملیونه څخه ډیر مسلمانان په کيمپونو کې قيديان دي ځکه چې بیجینګ هڅه کوي چې دا ټولنه په زور يو ځای کړي او د هغې اسلامي میراث له مینځه یوسي. .

د متحده ایالاتو سناتورانو د اکتوبر په ۲۷ مه یو پریکړه لیک صادر کړ او اعلان یې وکړو چې د چین رژیم په شین جانګ کې د اویغورانو او نورو ترکي ژبه ويونکو نسل وژنه کوي. .

د زورواکۍ پر ضد مبارزه

په مرکزي آسیا کې، دغه سیمه چې په جغرافيايي او سياسي لحاظ سره له بدلون سره مخ ده او د روسیې او چین رژیمونه پکې د نفوذ ترلاسه کولو لپاره هلې ځلې کوي.

خو د متحده آیالاتو پوځ د اکتوبر په ۲۰ مه د ملګرو هیوادونو سره د اتحاد پیاوړي کولو او د نويو لارو چارو موندلو لپاره د يو نوښت اعلان وکړو چې د روسیې او چین د نړیوال نفوذ پروړاندې د خپلو پوځونو ترمينځ د همغږۍ رامينځته کولو لپاره نوې لارې ومومي.

د امریکې د دفاع وزیر مارک ایسپر وويل، "چین او روسیه په چټکۍ سره خپل وسله وال ځواکونه عصري کوي او خپل مخ په وده کونکی قوت کاروي چې نړیوال قانون له پامه وغورځوي، د هيوادونو له حاکمیت څخه سرغړونه وکړي او د قدرت توازن بدل کړي.

هغه وویل، په سویلي چین بحر کې د بيجينک جارحيت او د اوکراین سره د کرملین جګړه "د دوی دا ناوړه هڅې په ډاګه کوي چې د نورو خپلواکي ختمه کړي او د هیوادونو او ادارو زغم او یووالي ته زیان ورسوي."

بیجینګ او ماسکو، که څه هم، د نفوذ ترلاسه کولو کليدي وسیلې نه لري: شراکتونه.

ايسپر وویل، "چین او روسیه شاید له لسو څخه لږ متحدین لري." هغه زیاته کړه چې د دوی غیر قانوني چلند به احتمالي ملګري متنفره کړي.

هغه وويل، "د امریکې د متحدینو او شریکانو شبکه ... هغه مثالي ګټه چمتو کوي چې زموږ مخالفین ورسره مقابله نه شي کولی."