| سياست

د خیبرپښتونخواه "د ښې حکومتدارۍ ستراتیژي" پلان لري چې په وخت خدمتونه او شفافيت وړاندې کړي

د سيد انصار عباس لخوا


د خیبر پښتونخواه یو چارواکی د مارچ په ۲۹ مه په پېښور کې "د ښې حکومتدارۍ ستراتیژي" وړاندې کوي. [سید انصار عباس]

د خیبر پښتونخواه یو چارواکی د مارچ په ۲۹ مه په پېښور کې "د ښې حکومتدارۍ ستراتیژي" وړاندې کوي. [سید انصار عباس]

پیښور -- خیبر پښتونخواه (کی پي) حکومت خپله نوي "د ښې حکومتدارۍ ستراتیژي" پیل کړې چې موخه یې د مختلفو عامو خدماتو کارکردګي ښه کول دي.

د چارواکو له مخې، حکومت هڅه کوي چې خدماتو رسولو ته وده ورکړي او په چټکتیا سره وګړو ته ځواب ورکړي، چې په دې کې د اورپکۍ لخوا ځپل شوي ضلعې هم شاملي دي.

دا ستراتیژي، چې د خيبر پښتونخواه د کارکردګۍ مدیریت او اصلاحاتو يونټ لخوا چمتو شوی او د مارچ په ۲۹ مه پیل شوي ده، په پنځو اساسي برخو تمرکز کوي: شفافيت او عوامي حکومت، د عامه خدماتو رسول، احتساب، د وګړو ګډون، نوښت او ټیکنالوژي.

د دې ستراتیژۍ د یوې برخې په توګه، حکومت د کارکردګۍ ۴۱ شاخصونه په ګوته کړي دي.

دا د حکومتي ادارو نه غوښتنه کوي چې د خپلو افسرانو او کارمندانو په اړه معلومات عام کړي، چې په دې کې د دوی واک، دندې، سهولتونه او امتیازات شامل دي.

دا ډول ادارې به په فعاله توګه د هغو کسانو انلاین تفصيلات ښکاره کړي چې امتیازونه، پرمټونه او لايسنسونه ترلاسه کوي.

دا ستراتیژي غواړي چې د قوانینو او مقرراتو، معلوماتو او خدماتو، نیلامونو، ټينډرونو، د دولتي ادارو د ګاډو، د دولتي اثاثو، د خالي آسامو، په دولتي کالجونو او تخنیکي موسسو کې د داخليدو د ميريټ لیسټونو او نورو معلوماتو خپرول او ښکاره کول يقيني کړي.

خلکو ته ځواب ورکول

د خیبر پښتونخواه وزیر اعلی محمود خان د مارچ په ۲۹ مه رسنیو ته وویل، "هغه چارواکو ته به انعام ورکول کيږي کوم چې ښه کار کوي، په داسې حال کې چې د چا کارکردګي ښه نه وي، د هغوی خلاف به ګامونه پورته کړی شي."

د خیبر پښتونخواه د اطلاعاتو وزیر، شوکت یوسفزۍ، د اپریل په ۱۰ مه پاکستان فارورډ ته وویل، "دا پروګرام به ډیر ارزښتناک ثابت شي او د صوبې د ټولو خلکو، په ځانګړي ډول د قبايلي ضلعو اوسیدونکو سره به مرسته وکړي."

یوسفزۍ وویل، "قبايلي خلک به توان ولري چې د ټولو ګټو څخه ګټه پورته کړي." "د ضم کيدو نه مخکې به قبایلي خلکو ډير په ګرانه څيزونه، حتی ډوميسايل او د پیدایش تصدیق نامې ترلاسه کولې."

شاهد محمود، چې د پي ايم آر يو کوآرډينيټر دی، پاکستان فارورډ ته وويل، دا ستراتیژي به د خیبرپښتونخواه حکومت ته توان ورکړي چې په ټوله صوبه کې ټولو معلوماتو ته د خلکو، د قبايلي ضلعو په ګډون، لاسرسی يقيني کړي.

هغه وويل، "حکومت بايد خپله کارکردګي ښه کړي." "اوس به د حکومت ټولې ادارې خپله ټوله ډيټا او معلومات خپلو ویب پاڼو ته اپلوډ کړي."

شاهد وویل، "موږ د خلکو د اسانتیا لپاره پرمختللي ټکنالوجۍ معرفي کوو." "موږ د عامو خلکو لپاره ۲۰۰ دلایل په ګوته کړل چې د حکومتي دفترونو څخه لیدنه وکړي."

هغه په دفترونو کې د وخت ضایع کولو نه د خلکو د بچ کولو لپاره طریقو ته په اشاره وویل، "حکومت له مخکې نه په دغو لاملونو کې د ۱۰۰ لاملونو لپاره [د ټکنالوجۍ] پلي کول پیل کړي دي." "درخواست ورکوونکي درخواستونه ترلاسه کولی شي او آنلاین یې جمع کولی شي."

شاهد وویل، "د قبایلي ضلعو او د وسله والو لخوا ځپل شويو نورو ضلعو اوسیدونکي به د دې تګلارې نه ډیره ګټه پورته کړي."

د پي ايم آر يو ډپټي کوآرډينيټر عادل رضا وویل، "موږ د هغو خدماتو ارزونه کوو چې آنلاین پیل شوي دي." "موږ به د هغو برخو په ګوته کولو کې کار وکړو چېرې چې پرمختګ ممکن وي."

رضا وويل، "موږ اي-حکومتداري آسانوو چې دفترونو ته د شخصي ليدنو مخه ونيسي." "په پرمختللي هیوادونو کې ټول کارونه د ټکنالوژۍ يعنې د موبايل فونونو او انټرنیټ له لارې ترسره کیږي."

هغه وويل، "د ټکنالوجۍ له لارې، هر ډول سافټویر کارول کیدی شي چیرې چې د پیسو خبره پکې نه وي، په داسې حال کې چې موږ به د ډیجیټل تادیاتو ستونزې حل کولو لپاره سافټویرونه معرفي کړو."

یوه ګټوره هڅه

افتاب احمد، ۳۴ کلن، چې په پیښور کې په یوه خصوصي موسسې کې کار کوي، وویل، هغه د حکومتدارۍ د ستراتیژۍ ستاینه کوي.

هغه پاکستان فارورډ ته وویل، "دا نوښت به خورا ګټور وي، په ځانګړي توګه د ځوانانو او هغو کسانو لپاره چې په عامه سکټور کې د کار په لټه کې دي."

احمد وويل، "ما نه غوښتل چې خپله دنده جاري وساتم ځکه چې کارمندانو په وخت معاشونه نه ترلاسه کول، نو ما د دغه کار د پريښودو پرېکړه وکړه." "اوس، د دفترونو لیدلو او په کتارونو کې د ودريدو پر ځای، زه د خالي آسامو په اړه معلومات ترلاسه کولی او آنلاین درخواست جمع کولی شم."

اکبر داور چې د شمالي وزیرستان اوسيدونکی دی او اوس مهال په پېښور کې کار کوي، د دې ستراتیژۍ ستاینه له دې کبله وکړه چې هر يو کس ته اجازه ورکوي چې د قواعدو، مقرراتو او طريقو په اړه په اسانۍ سره آنلاین معلومات ترلاسه کړي.

داور پاکستان فارورډ ته وويل، "د خيبر پښتونخواه سره د فاټا [د وفاق تر کنټرول لاندې قبايلي سيمې] د ضم کيدو نه مخکې، د ډوميسايل او د زیږون سندونه ترلاسه کول ډير ګران کار وو او ډير زيات وخت يې غوښتو." "آنلاین معلوماتو ته لاسرسۍ هرڅه آسان کړي دي."

هغه وويل، "د استعمار د دور قوانينو د قوم غړي د حکومتي دفترونو نه لرې ساتلې ول." "هلته کې محکمې موجود نه وې" او "دوی به د اسنادو لپاره پیسې ورکولې."

داور وويل، "اوس نظام بدل شوی او په قبايلي سيمو کې يو حکومتي چارواکی له همکارۍ څخه انکار نه شي کولی."

آیا دا لیکنه ستاسو خوښه شوه؟

2
0
نه
تبصرې 0
د تبصرو تګلاره Captcha