قرضوں کا سلسلہ: سری لنکا کی چین کے ساتھ کاروبار کرنے کی نصیحت آموز کہانی

ہمبنتوتا، سری لنکا -- تجزیہ کاروں نے خبردار کیا ہے کہ بیجنگ کے ساتھ کاروبار کرنے کے خطرات سری لنکا میں واضح طور پر بیان کیے گئے ہیں، جو کہ چینی قرضوں اور بنیادی ڈھانچے کے منصوبوں کی خرابی کی وجہ سے ایک بڑے سیاسی اور اقتصادی بحران سے گزر رہا ہے۔

ان کا کہنا ہے کہ سری لنکا میں سیکھے گئے اسباق چینی قرضوں کے مقروضوں اور چینی بنیادی ڈھانچے کے منصوبوں کے وصول کنندگان کے لیے ایک نصیحت آموز کہانی بیان کرتے ہیں -- خصوصاً وہ جو بیلٹ اینڈ روڈ پہل کاری (بی آر آئی)سے وابستہ ہیں، جسے ون بیلٹ، ون روڈ (او بی او آر) بھی کہا جاتا ہے۔

دفاعی حکمتِ عملی اور بین الاقوامی امور کے تجزیہ کار میجر (ریٹائرڈ) امیت بنسل نے گزشتہ جمعہ (15 جولائی) کو ہندوستان کے مقامی ایک آزاد تھنک ٹینک سرخ لالٹیں تجزیات (آر ایل اے) کی میزبانی میں منعقدہ ایک آن لائن کانفرنس میں کہا کہ چین کے قرضوں کے جال کا نقشہ بالکل سیدھا ہے۔

آر ایل اے نے بنسل کے حوالے سے ٹویٹ کیا، "ملک کا تزویراتی طور پر واقع ہونا لازمی ہے، یہ لازماً غریب ہو اور انتظامیہ میں بدعنوان سیاست دان ہونے چاہیئیں۔ ایک بار جب 3 شرائط پوری ہو جائیں؛ چین فراخدلی سے قرضوں کی پیشکش کرتا ہے اور آہستہ آہستہ اس کی خودمختاری چھین لیتا ہے"۔

جموں کی سنٹرل یونیورسٹی میں قومی دفاعی مطالعات کے اسسٹنٹ پروفیسر جے جگناتھن نے کہا کہ چین کا بی آر آئی کے نام پر ممالک کو قرضوں کی پیشکش کرنے کا انداز یکساں ہے۔

آر ایل اے کے مطابق، ان کا کہنا تھا، "انہوں نے ہمیشہ آمرانہ حکومتوں کا انتخاب کیا ہے جن میں احتساب اور عوامی شفافیت کا فقدان ہو۔ وہ قرضوں کی پیشکش کرتے ہیں اور انتظار کرتے ہیں کہ قرض ملک کو پھنسا اپنے اندر جکڑ لے"۔

مشرق وسطیٰ اور وسط ایشیا کے بہت سے ممالک، بشمول عراق، مصر، ایران، قازقستان، تاجکستان، ازبکستان اور کرغیزستان، جو سب کے سب چین کے اربوں کے مقروض ہیں، اسی طرز سے مطابقت رکھتے ہیں۔

موتیوں کی لڑی

سری لنکا میں، سفید ہاتھی منصوبوں کی مثالیں بہت زیادہ ہیں جنہوں نے بحران کو ہوا دینے میں مدد کی: دنیا کا "خالی ترین" ہوائی اڈہ، کھانا کھانے والوں کے بغیر ایک گھومتا ہوا ریستوران، 350 میٹر اونچا کولمبو لوٹس ٹاور، ایک بہت بڑا کرکٹ سٹیڈیم، بمشکل استعمال ہونے والا بین الاقوامی کانفرنس ہال، درجنوں غیر استعمال شدہ سڑکیں اور پُل، اور قرضوں سے لدی بندرگاہ، اور اس کے علاوہ اور بہت کچھ۔

سری لنکا اور چینی حکام کی جانب سے اس یقین دہانی کے باوجود کہ ملک میں بیجنگ کی سرمایہ کاری "مکمل طور پر اقتصادی" ہے، مبصرین اس کے پسِ پُشت محرکات کو دیکھتے ہیں۔

ایک سابق امریکی سفارت کار اور امریکی محکمۂ دفاع کی نیٹو اور ہند-بحرالکاہل کمانڈز میں ایک فوجی پروفیسر، پیٹرک مینڈس نے کہا، "درحقیقت، سری لنکا پورے ہند-بحرالکاہل خطے میں چین کے اربوں ڈالر کے بی آر آئی کا 'شاہی جوہر' ہے، جو ہمبنتوتا بندرگاہ، کولمبو پورٹ سٹی، کولمبو لوٹس ٹاور اور بہت سے دوسرے بنیادی ڈھانچے کے منصوبوں کو آپس میں جوڑتا ہے"۔

انہوں نے 11 جولائی کو ہارورڈ بین الاقوامی جائزے میں لکھا، "ان بندرگاہوں کو باآسانی دوہرے مقاصد کے فوجی اور شہری استعمال کی عمارات میں تبدیل کیا جا سکتا ہے۔"

"مزید برآں، قریبی متالا راجا پاکسا بین الاقوامی ہوائی اڈے کو مستقبل میں استعمال کے لیے شہری اور فوجی دوہری تنصیب کے ممکنہ ارادے سے تعمیر کیا گیا تھا۔"

چین نے سنہ 2017 میں جبوتی میں اپنا پہلا سمندر پار فوجی اڈہ کھولا تھا، جو مبینہ طور پر بحرِ ہند اور مشرقی افریقہ کے گرد سمندری کارروائیوں میں سہولت فراہم کرنے کے لیے تھا۔ بیجنگ نے خلیج عدن میں بحری قزاقی کے خطرے اور اہم بین الاقوامی سمندری راستوں کو محفوظ بنانے کی اپنی خواہش کو جواز کے طور پر استعمال کیا تھا۔

بیجنگ حکام نے مغربی افریقہ میں بھی ایک فوجی اڈے کا جواز گھڑنے کے لیے اسی طرزِ استدلال کو استعمال کیا ہے۔

پچھلے برس کے آخر میں جب یہ خبر پھیلی کہ چین متحدہ عرب امارات (یو اے ای) میں خفیہ طور پر ایک فوجی اڈہ تعمیر کر رہا ہے، تو پورے خطے اور اس سے باہر خطرے کی گھنٹیاں بج اُٹھیں۔

حالیہ برسوں میں، سری لنکا میں بڑے پیمانے پر بنیادی ڈھانچے کی مہم کے علاوہ، چین نے پاکستان, ایران اور دیگر اہم علاقوں میں تجارتی بندرگاہوں کی عمارات تعمیر کی ہیں جنہیں اس کی تیزی سے پھیلتی ہوئی بحریہ کی جانب سے استعمال کیا جا سکتا ہے۔

یہ سب بیجنگ کی فوجی اور تجارتی عمارات کے نیٹ ورک کے ذریعے سرزمینِ چین کو ہارن آف افریقہ سے منسلک کرنے کے لیے "موتیوں کی لڑی" کی حکمت عملی کا جزو ہیں۔

وسط جنوری میں، تہران نے اعلان کیا تھا کہ وہ چین کے ساتھ 25 سالہ جامع تزویراتی تعاون کے معاہدے پر عمل درآمد شروع کر رہا ہے، جس پر گزشتہ سال دستخط ہوئے تھے۔

معاہدے کی شرائط کے تحت ایران 400 بلین ڈالر کے سرمایہ کاری کے منصوبوں کے آغاز کے ذریعے بی آر آئی میں شامل ہو گا۔

اگرچہ یہ معاہدہ بظاہر تجارتی نوعیت کا ہے، لیکن ایرانی بندرگاہوں جاسک اور چاہ بہار میں چینی سرمایہ کاری اس کی تیزی سے بڑھتی ہوئی بحریہ کو اپنی رسائی کو بڑھانے کا موقع فراہم کرے گی۔

وال سٹریٹ جرنل نے امریکی اور اتحادی حکام کا حوالہ دیتے ہوئے سنہ 2019 میں خبر دی تھی کہ ایک اور مثال میں، چین نے کمبوڈیا کے ساتھ ایک خفیہ معاہدہ کیا تاکہ اس کی بحریہ کو اس ملک میں ایک اڈہ استعمال کرنے کی اجازت دی جائے۔

چینی اور کمبوڈین دونوں حکام نے ان رپورٹوں کی تردید کرتے ہوئے انہیں "جعلی خبریں" اور "افواہیں" قرار دیا تھا۔

واشنگٹن پوسٹ نے 6 جون کو مغربی حکام کے حوالے سے خبر دی کہ، لیکن اب چین خفیہ طور پر کمبوڈیا میں اپنی فوج کے خصوصی استعمال کے لیے ایک بحری تنصیب تعمیر کر رہا ہے۔

مینڈس کے مطابق، "ان تمام منصوبوں کو ابتدائی طور پر بی آر آئی کے اندر ترقیاتی امداد کے طور پر فروغ دیا گیا تھا۔ درحقیقت، بی آر آئی ترقی پذیر ممالک کو اپنے اثر و رسوخ کے دائرے میں لانے کے لیے چین کی بوالہوس خارجہ پالیسی کی حکمت عملی رہی ہے جیسا کہ سری لنکا کی 'نصیحت آموز کہانی' میں دکھایا گیا ہے۔"

سری لنکا میں بحران

سری لنکا میں مہینوں کے بلیک آؤٹ اور خوراک اور ایندھن کی شدید قلت کے بعد، معاشی بدانتظامی پر حکومت سے مستعفی ہونے کا مطالبہ کرنے والے ہفتوں کے بڑے پیمانے پر پُرامن احتجاج مئی میں پُرتشدد ہو گئے، جس میں پانچ افراد ہلاک اور کم از کم 225 زخمی ہوئے۔

صدر گوتابایا راجا پاکسا جولائی میں ملک سے فرار ہو گئے تھے۔

یہ بحران چینی فنڈ سے چلنے والے منصوبوں کی وجہ سے بڑھ گیا ہے جو حکومتی اسراف کی نظر انداز یادگار کے طور پر کھڑے ہیں۔

بنیادی ڈھانچے کی مہم کا مرکز دنیا کی سب سے مصروف مشرقی مغربی جہاز رانی لین پر ایک گہری بندرگاہ تھی جس کا مقصد صنعتی سرگرمیوں کو فروغ دینا تھا۔

اس کی بجائے، جب سے اس نے کام شروع کیا ہے اس وقت سے اس نے پیسہ بہایا ہی ہے۔

ایک طویل عرصے سے ہمبنتوتا کی مکین ڈینوکا نے اے ایف پی کو بتایا، "جب منصوبوں کا اعلان کیا گیا تو ہم بہت پُر امید تھے، اور یہ علاقہ بہتر ہو گیا۔"

"لیکن اب اس کا کوئی مطلب نہیں ہے۔ وہ بندرگاہ ہماری نہیں ہے، اور ہم جینے کے لیے ہاتھ پاؤں مار رہے ہیں۔"

ہمبنتوتا بندرگاہ اپنی تعمیر کی مالی اعانت کے 1.4 بلین ڈالر کے چینی قرضوں کی فراہمی میں ناکام رہی، جس سے چھ سالوں میں 300 ملین ڈالر کا نقصان ہوا۔

سنہ 2017 میں، بندرگاہ ایک چینی سرکاری کمپنی کو 99 سالہ پٹے پر دی گئی تھی - ایک ایسا معاہدہ جس نے پورے خطے میں خدشات کو جنم دیا کہ بیجنگ نے بحرِ ہند میں ایک تزویراتی قدم جما لیا ہے۔

بندرگاہ کو نظر انداز کرنا ایک اور چینی حمایت یافتہ اسراف ہے: 15.5 ملین ڈالر کا کانفرنس سنٹر جو کھلنے کے بعد سے زیادہ تر غیر استعمال شدہ ہے۔

اس کے قریب ہی راجا پاکسا ہوائی اڈہ ہے، جو چین کے 200 ملین ڈالر کے قرض سے بنایا گیا ہے، جو اس قدر کم استعمال ہوتا ہے کہ ایک موقع پر یہ اپنا بجلی کا بل پورا کرنے سے بھی قاصر تھا۔

دارالحکومت کولمبو میں، چین کی مالی اعانت سے چلنے والا ساحلی شہر منصوبہ ہے -- مصنوعی 665 ایکڑ پر مشتمل ایک جزیرہ جس کا مقصد دبئی کے مقابلے میں مالیاتی مرکز بننا ہے۔

لیکن ناقدین پہلے ہی اس منصوبے پر "خفیہ قرضوں کا جال" بننے پر آواز اٹھا چکے ہیں۔

قرض میں ڈوبا ہوا

چین کولمبو کا سب سے بڑا دو طرفہ قرض دہندہ ہے اور اس کے 51 بلین ڈالر کے بیرونی قرضوں میں سے کم از کم 10 فیصد کا مالک ہے۔

تجزیہ کاروں کا کہنا ہے کہ اگر سرکاری فرموں اور سری لنکا کے مرکزی بینک کے قرضوں کو مدِنظر رکھا جائے تو حقیقی رقم کافی زیادہ ہے۔

قرضوں کے بڑھتے ہوئے بوجھ کو پورا کرنے میں ناکام، اور کریڈٹ ریٹنگ میں کمی کے باعث بین الاقوامی کرنسی مارکیٹ میں تازہ قرضوں کے ذرائع ختم ہو رہے ہیں، سری لنکا کی حکومت نے اپریل میں اپنے غیر ملکی قرضوں کی ذمہ داریوں میں دیوالیہ ہونے کا اعلان کیا تھا۔

اس نے چین کے ساتھ اپنے ادائیگی کے نظام الاوقات پر دوبارہ بات چیت کرنے کی کوشش کی تھی، لیکن بیجنگ نے اس کی بجائے موجودہ قرضوں کی ادائیگی کے لیے مزید قرضوں کی پیشکش کر دی۔

اس تجویز کو سری لنکا کی جانب سے انٹرنیشنل مانیٹری فنڈ (آئی ایم ایف) سے مدد کی اپیل نے ناکام بنا دیا تھا۔

چینی سفیر کی ژین ہونگ نے اس وقت صحافیوں کو بتایا، "چین نے سری لنکا کی دیوالیہ نہ ہونے میں مدد کرنے کی پوری کوشش کی ہے، لیکن افسوس کی بات ہے کہ وہ آئی ایم ایف کے پاس گئے اور دیوالیہ ہونے کا فیصلہ کیا"۔

سری لنکا کے بہت سے باشندوں کے لیے، بڑے پیمانے پر غیر استعمال شدہ بنیادی ڈھانچے کے منصوبے چین کے ساتھ کاروبار کرنے کے خطرات کی مضبوط علامت بن گئے ہیں۔

کولمبو میں کتابوں کی ایک چھوٹی دکان کے مالک، کرشنتھا کولاتونگا نے کہا، "ہم تو پہلے ہی قرضوں میں ڈوبے ہوئے ہیں۔"

کولاتونگا کا کاروبار لوٹس ٹاور کے داخلی دروازے کے قریب ہے، پھولوں کی شکل کی یہ فلک بوس عمارت چینی سرمائے سے بنی ہے۔

ٹاور کا رنگین شیشے کا سامنے والا حصہ دارالحکومت کے خطِ فلکی پر حاوی ہے، لیکن اس کا اندرونی حصہ -- اور شہر کے خوبصورت نظاروں والا ایک منصوبہ بند گھومنے والا ریستوران -- عوام کے لیے کبھی نہیں کھولا گیا۔

کولاتونگا نے پوچھا، "اگر ہم کھانے کے لیے بھیک مانگتے رہ جائیں تو اس مینار پر فخر کرنے کا کیا فائدہ؟"