ایران اتحادی عراقی ملیشیاؤں کے ذریعے روس کو اسلحہ فراہم کر رہا ہے: رپورٹ

ایک نئی رپورٹ میں انکشاف کیا گیا ہے کہ ایرانی ہتھیاروں کی سمگلنگ کے نیٹ ورک راکٹ سے چلنے والے گرنیڈ (آر پی جیز) راکٹ لانچر سسٹم اور ٹینک شکن میزائلوں کو عراق سے روس پہنچا رہے ہیں تاکہ یوکرین پر اس کے حملے میں مدد کی جا سکے۔

گزشتہ ہفتے گارڈین نے خبر دی تھی کہ ہتھیاروں کی سمگلنگ کی کوشش ایران سے منسلک عراقی ملیشیاؤں کی مدد سے کی جا رہی ہے۔

ذرائع ابلاغ نے بتایا کہ نقل و حمل کا انتظام کرنے میں مدد دینے والے ایک ذریعے کے مطابق، تہران نے ماسکو کو ایرانی ساختہ Bavar 373 میزائل سسٹم بھی عطیہ کیا ہے، اور روسی S-300 میزائل سسٹم اپنے شمالی اتحادی کو واپس کر دیا ہے۔

اس میں کہا گیا کہ حربی سازوسامان اور عسکری آلات 26 مارچ کو عراق کے صوبہ بصرہ میں ایران کے ساتھ شلمچہ سرحدی گزرگاہ کے ذریعے ایران پہنچائے گئے۔

ای ایس ٹی اے میڈیا نیٹ ورک نے منگل کے روز بتایا کہ عراقی حکومت کے ذرائع اور عراق کے سرحدی گزرگاہ کمیشن کے ترجمان نے کہا کہ "ہو سکتا ہے کہ کسی فریق نے ان نتائج کے ردِعمل میں پڑوسی ملک کو ہتھیار بھیجے ہوں"۔

ماہرین کا کہنا ہے کہ ایران کے ساتھ منسلک ملیشیائیں ایران کے ساتھ سرحدی علاقے کے زیادہ تر حصے پر قابض ہیں، اگرچہ عراقی حکومت نے جولائی 2020 میں شلمچہ اور دیگر گزرگاہوں پر بدعنوانی، سمگلنگ اور غیر قانونی سرگرمیوں سے نمٹنے کے ایک منصوبے پر عمل درآمد شروع کیا تھا۔

ایران نے سرحدی گزرگاہ میں واضح دلچسپی ظاہر کی ہے، فروری میں کرمان شاہ چیمبر آف کامرس کے ایک ایرانی اہلکار نے کہا کہ وہ اس گزرگاہ کو "شام اور لبنان کے ساتھ تجارت کے لیے ایک گیٹ وے" کے طور پر دیکھتا ہے۔

2 مارچ کو ہونے والی ایک کانفرنس میں، ایرانی ٹریڈ ڈویلپمنٹ آرگنائزیشن کے ڈائریکٹر فرزاد بیلٹن نے کہا کہ ایرانی حکومت جنوبی عراقی صوبوں (بصرہ، ذی قار اور میسان) کے ساتھ ریلوے لنک قائم کرنے کی کوشش کر رہی ہے۔

انہوں نے دونوں ممالک کے درمیان شلمچہ سرحدی گزرگاہ سے متفقہ انتظام کے لیے کام کرنے کی ضرورت کی طرف اشارہ کیا۔

شمال-جنوب نقل و حمل راہداری

گارڈین نے کہا کہ گزرگاہ کو کنٹرول کرنے والی ملیشیا کے ایک کمانڈر کے مطابق، ایرانی فوج نے شلمچہ میں کھیپ حاصل کی اور اسے سمندر کے راستے روس لے گئی۔

ملیشیا کے ایک ذریعے کے مطابق، ایران سے منسلک ملیشیاؤں نے برازیل کے ڈیزائن کردہ دو راکٹ لانچر سسٹموں کو بھی کھولا اور بھیج دیا۔

دی گارڈین نے زور دیا کہ تین مال بردار بحری جہاز جو اس طرح کا بوجھ اٹھانے کی صلاحیت رکھتے ہیں -- دو روسی پرچم والے اور ایک ایرانی پرچم والا -- اس عرصے میں ایران کی بندرگاہ بندرِ انزالی سے روسی شہر استراخان تک بحیرہ کیسپین کو عبور کر چکے ہیں۔

بروکنگز انسٹیٹیوٹ کی جولائی 2002 کی رپورٹ کے مطابق، دو دہائیاں قبل، روس، ایران اور بھارت نے شمال-جنوب نقل و حمل راہداری کے لیے ایک نصب العین پر دستخط کیے تھے۔

یہ بھارت، ایران، افغانستان، آذربائیجان، روس، وسطی ایشیا اور یورپ کے درمیان مال کی نقل و حمل کے لیے 7,200 کلومیٹر طویل جہاز، ریل اور سڑک کا راستہ ہے۔

واشنگٹن میں قائم تھنک ٹینک نے کہا کہ یہ راستہ بحیرۂ عرب کے پار ہندوستان سے ایرانی بندرگاہ بندر عباس تک پھیلا ہوا ہے، جہاں سے سامان ایران اور بحیرۂ کیسپین سے روس کے کیسپین سیکٹر کی بندرگاہوں تک پہنچایا جاتا ہے۔

اس میں کہا گیا ہے کہ سوویت دور میں لاکھوں ٹن عبوری تجارتی سامان یورپ سے ایران کے راستے یو ایس ایس آر اور اس راستے سے یو ایس ایس آر اور ہندوستان کے درمیان گزرتا تھا۔

بروکنگز انسٹیٹیوٹ نے کہا کہ اپریل 2002 میں کیسپین ساحل پر آسٹرخان کے دورے کے دوران، روسی صدر ولادیمیر پیوٹن نے شمال-جنوب نقل و حمل راہداری کی اقتصادی اہمیت کا ذکر کیا تھا۔

'روسی حکمت عملی میں تبدیلی'

گارڈین نے کہا، "ہتھیاروں کی سمگلنگ کرنے والے انڈرورلڈ کا استعمال روسی حکمت عملی میں ڈرامائی تبدیلی کا اشارہ دے گا، کیونکہ ماسکو یوکرین پر حملے کی وجہ سے نئی پابندیوں کے بعد شام میں اپنے فوجی اتحادی ایران کی طرف جھکاؤ رکھنے پر مجبور ہے۔"

کارنیگی مڈل ایسٹ سینٹر کے فیلو موہاند ہیگ علی نے کہا کہ زیرِ بحث ہتھیاروں کی قسم "یوکرین میں زمینی سطح پر بڑا فرق ڈالے گی"۔

انہوں نے گارڈین کو بتایا، "نئی پابندیوں کی صورت حال کے پیش نظر، دیگر ممالک جیسے کہ چین کو اب روس کو ہتھیار دینے میں بہت محتاط رہنا ہو گا ۔ اور ایران، اس محور کے ایک جزو کے طور پر، اس بات کو یقینی بنانا چاہتا ہے کہ روس اس تنازعے میں پسپا نہ ہو۔"

انہوں نے مزید کہا کہ " اگر پیوٹن حکومت غیر مستحکم ہوتی ہے، تو اس کے ایران پر بہت زیادہ اثرات مرتب ہوں گے، خاص طور پر شام میں، جہاں دمشق روسی فضائی مدد پر منحصر ہے اور روس ان کے اور اسرائیل کے درمیان براہِ راست تصادم سے بچنے کے لیے تعاون کرتا ہے۔"

روس کو اس وقت یوکرین کے خلاف اپنی جنگ کے نتیجے میں وسیع پابندیوں کا سامنا ہے، جس میں فوجی استعمال کی اشیاء بھی شامل ہیں۔ دیگر ناکامیوں کے علاوہ، اس سے اس کے بکتر بند گاڑیوں کے مرکزی پلانٹ میں پرزوں کی کمی واقع ہو گئی ہے۔