کرونا وائرس کے وبا بننے میں اپنے کردار پر پردہ ڈالنے کی کوشش میں چین سازشیں پھیلا رہا ہے

چین وائرس کے آغاز سے متعلق نظریہ ہائے سازش کو فروغ دے کر دنیا بھر میں کرونا وائرس وبا کے پھیلاؤ میں اپنے کردار پر ہونے والی تنقید کا رخ موڑنے کے لیے بھرپور کوشش کر رہا ہے۔

ان الزام آموز نظریہ ہائے سازش کا پھیلاؤ چین کے عوام کی جانب سے نہیں بلکہ حکومتِ چین کے اعلیٰ ترین عہدوں کی جانب سے ہو رہا ہے۔

گزشتہ ہفتے چین کی وزارتِ خارجہ کے ترجمان ژاؤ لِنژان نے چینی اور انگریزی ٹویٹس میں رائے دی کہ ہوسکتا ہے کہ اس عالمی وبا کا "پہلا مریض" امریکہ سے آیا ہو – نہ کہ چینی شہر وُوہان سے، جہاں 2019 کے اواخر میں پہلے کیسز کی اطلاع ملی۔

ژاؤ، جو کہ سوشل میڈیا پر اپنے اشتعال انگیز بیانات کے لیے معروف ہیں، نے ٹویٹ کیا، "ہو سکتا ہے کہ امریکی فوج اس وبا کو وُوہان لائی ہو۔ شفاف رہیں! اپنے اعدادوشمار عام کریں! امریکہ کو ہمیں وضاحت دینی ہے۔"

امریکی محکمہٴ خارجہ نے کہا کہ امریکہ نے ژاؤ کے پراشتعال بیانات کے بعد انہیں "نامعقول" سمجھتے ہوئے، 13 مارچ کو چین کے سفیر کو طلب کیا۔

محکمہٴ خارجہ کے ایک اہلکار نے کہا، "چین ایک عالمی وبا کا آغاز کرنے اور دنیا کو نہ بتانے میں اپنے کردار پر تنقید کا رخ موڑنے کی کوشش کر رہا ہے۔"

اہلکار نے کہا، "نظریہ ہائے سازش پھیلانا خطرناک اور نامعقول ہے۔ ہم حکومت کو بتانا چاہتے تھے کہ ہم چینی عوام اور دنیا کی بہتری کے لیے اسے برداشت نہیں کریں گے۔"

سائنسدانوں نے وسیع پیمانے پر دعویٰ کیا کہ یہ وبا وُوہان میں ایک مارکیٹ سے شروع ہوئی جہاں عجیب و غریب جانور انسانوں کے کھانے کے لیے فروخت کیے جاتے تھے۔

امریکی صدر ڈانلڈ ٹرمپ نے اس وبا پر ایک ہنگامی صورتِ حال کا اعلان کرنے کے لیے صحافیوں سے بات کرتے ہوئے چین کے اس نظریہٴ سازش کی بھی تردید کی۔

ٹرمپ نے کہا، "وہ جانتے ہیں کہ یہ کہاں سے آئی۔ ہم سب جانتے ہیں کہ یہ کہاں سے آئی،"

کیمیونسٹ جماعت کی ریاست کے لیے غلط معلومات پھیلانا کوئی نئی ترکیب نہیں۔ بطورِ خاص امریکہ اکثر چین کی پراپیگنڈا کی کوششوں کی ناکامی کی جگہ رہا ہے۔

شدید نظریہ ہائے سازش

اب تک 5,300 افراد کی ہلاکت اور 140,000 کے متاثر ہونے کے ساتھ، جیسے جیسے ناول کروناوائرس شدید طور پر اثرانداز ہو رہا ہے، سوشل میڈیا پر بڑے پیمانے پر نظریہ ہائے سازش زیرِ گردش ہیں۔

گزشتہ ماہ یہ انکشاف ہوا کہ روس سے متعلقہ ہزاروں سوشل میڈیا اکاؤنٹس نے کروناوائرس سے متعلق نظریہ ہائے سازش پھیلانے کے لیے مربوط کوشش کا آغاز کیا ہے، جن میں یہ رائے دی گئی کہ COVID-19 کے وبا بننے کے پیچھے امریکہ کا ہاتھ ہے۔

روسی غلط معلومات کا مقابلہ کرنے پر معمور امریکی حکام نے اے ایف پی سے بات کرتے ہوئے کہا کہ ٹویٹر، فیس بک اور انسٹاگرام پر جعلی شخصیات کثیر زبانوں میں روسی نکاتِ نظر کو فروغ دے رہے ہیں۔

مزید برآںعوام کو درست معلومات پہنچانے میں حکومتِ ایران کی ناکامیپر بین الاقوامی خدشات بڑھ رہے ہیں، جیسا کہ ملک میں کرونا وائرس کی بے قابو وبا ہمسایہ ممالک اور اس سے بھی آگے باعثِ خدشہ ہے۔