کويټه -- چارواکو ډان خبري اژانس ته وويل، چې د چهارشنبې په ورځ (د نومبر په ۱۵ مه) د بلوچستان په کیچ ډسټرکټ کې چارواکو په ګولو سوري ۱۵ لاشونه وموندل.
یو افسر د نوم د نه ښودلو په شرط ډان خبري اژانس ته وویل، ليوي ځواک په بلېدا تحصیل کې دغه مړي وموندل.
نوموړي افسر وویل، په ټولو قربانيانو باندې د نژدې نه ډزې شوي وې. داسې ښکاريده چې دوی د پنجاب صوبې د بیلابیلو ډسټرکټونو سره تعلق لرلو.
ډان خبري اژانس راپور ورکړو، چارواکو لا تراوسه نه ده معلومه کړې چې آیا قربانیان کارګران یا غیرقانوني کډوال وو چې ګاونډی ایران ته يې د ننوتلو هڅه کوله. دا هغه يوه لار ده چې پاکستانيان يې یونان او نورو اروپایی هیوادونو ته د تلو لپاره کاروي.
د کیچ ډسټرکټ په بلوچستان کې تر ټولو خطرناک ډسټرکټ ګڼل کیږي. وسله والو په دغه سيمه کې په وار وار په کارګرانو او امنیتي پرسونلو بریدونه کړي دي.