لاهور -- جيو نيوز خبر ورکړو چې د تحریک طالبان پاکستان د اورپکۍ ډلې جماعت الاحرار لږترلږه اته شکمن وسله وال په پنجاب کې د چهارشنبې په ورځ (د اپریل په ۱۹مه) ووژل شول.
دغه وسله وال د شيخوپوره په نرنګ منډهۍ سيمه کې د پنجاب پوليسو د ترهګرۍ سره د مبارزې ادارې سره تېره شپه په نښته کې ووژل شول.
د سي ټي ډي يو چارواکي وويل، چې پولیسو ۳ کلوګرامه چاودېدونکي توکي، ځانمرګي واسکټونه، درې کلاشينکوفونه، پنځه د لاس ټوپکونه او ګوله بارود د دغه ځای نه ترلاسه کړل.