ایران په خلیج کې د وسلو او تیلو د قاچاق لپاره له سمندري غلو څخه کار اخلي

د رسنیو راپورونه او کارپوهان وايي، د اسلامي انقلابي ګارډ قول اردو (آی آر جي سي) د خلیج په سیمه کې د وسلو، تيلو او مخدره توکو د قاچاق لپاره د سمندري غلو او د دوکه شويو ملاحانو په یوې شبکې تکیه کوي.

د هندي ملاحانو لوی شمېر د ایراني بار وړونکو شرکتونو لخوا په خطرناکو حالاتو کې کار کولو ته هڅول شوي چې د هغه مخدره توکو او کارګو لیږد پکې شامل دي چې د نړیوالو بندیزونو لاندې دي -- او دوی ډېر وختونه لږ یا هیڅ معاش نه لري.

واشنګټن پوسټ د جنورۍ په میاشت کې راپور ورکړو چې استخدامونکي په زرګونو کسانو ته هر کال ایران ته د تګ لپاره په نامتو کښتیو کې د معاشونو او تجربې تضمین ورکوي او اکثر ورسره د منځني ختیځ په نورو هېوادونو کې د دندو ورکولو ژمنه کوي.

د دوو درجنو څخه زیاتو کسانو له مخې، چې د دې راپور لپاره ورسره مرکې شوې وې، د دې پرځای، دوی ایران ته لیږل کیږي او په بحر کې ځای پر ځای کیږي، چېرته چې دوی ډېر کار کوي، کافي خواړه نه لري او ځینې وختونه د مخدره توکو او منع شويو کارګو لیږدولو ته اړ کیږي.

"دوی د معاش پرته د کار لپاره سمندري ملاحان په نښه کوي. اکشی کمار، چې د ډېلي څخه یو ۲۴ کلن ډیک کېډټ دی، وویل، دا ټول یو لوی جال دی." "دوی موږ مجبوره کړو چې د غلامانو په څېر کار وکړو."

یو ۲۸ کلن هندي سمندري ملاح وویل هغه د ۲۰۱۶ او ۲۰۲۰ کلونو ترمنځ د ایران د ډیزلو په قاچاق کې د ښکېلو دوو شرکتونو لپاره کار کولو، د هغه په وینا د تېلو بار وړونکي ټانکرونه تل په نړیوالو اوبو کې ودريږي چې ایران او متحده عرب امارات له يو بل نه جدا کوي.

هغه وویل، "د متحده عرب اماراتو ځمکنۍ اوبه له ۱۲ میلونو وروسته پای ته رسیږي، نو ایراني کښتۍ متحده عرب اماراتو ته له ۱۴ څخه تر ۲۰ میلونو پورې نږدې راځي." "دوی خپل ای آی اېس [د اتوماتیکي پیژندنې سیسټم] بندوي ترڅو دوی تعقیب نشي. که دوی د متحده عرب اماراتو ساحل ساتونکي وویني، دوی عملیات ودروي او تښتي."

کښتۍ د متحده عرب اماراتو د ځمکنیو حدودو څخه بهر ودريږي او بیا یو په بل پسې، کوچنۍ کښتۍ چې قاچاق شوي ایراني ډیزل وړي خپل بارونه انتظار کونکي کښتیو ته انتقالوي.

یو ۲۷ کلن هندي سمندري ملاح، چې په دوبۍ کې د یو بار وړونکي شرکت لخوا ګمارل شوی و چې سومالیا ته یې ایراني تېل قاچاق کول، وویل، "دا له څلورو څخه تر پنځو ورځو پورې وخت نیسي ځکه چې کښتۍ ځان ځانله راځي."

د راپور له مخې، په سمندر کې د شپې د لیږدونې سربیره، نړیوالو بازارونو ته د ایران ډیزل په ټانکرونو کې صادریږي او له ایران څخه بار وړل پيل کوي او داسې يې ښکاره کوي چې دا د عراق یا متحده عرب اماراتو څخه راغلې ول.

د انرژۍ او سیمه ییز امنیت د شنونکو په وینا، په قاچاق کې د ایران د دولت عناصر، په ځانګړې توګه آی آر جي سي، او د خلیج په هېوادونو کې د خصوصي بار وړلو شرکتونه شامل دي.

د متحده آيالاتو د خزانې وزارت په وروستیو کلونو کې پر ایران تور پورې کړی چې خپل تېل په غیر قانوني توګه پلوري او د دې د تېلو پر صنعت یې بندیزونه ولګول.

د سمندري غلو سره همکاري کول

په همدې حال کې هغه قزاقان او قاچاقبران چې د سیمې د اوبو په لارو کې د امنیتي کړکېچ له امله زیانمن شوي د خپلو زیانونو د پوره کولو لپاره ایران ته ورځي.

راشد محمد المري، چې د دوبۍ د پولیسو د مخدره موادو ضد څانګې پخوانی افسر دی، وويل، "د عرب خلیج سیمه او عرب بحیره لکه د ټولو نړیوالو اوبو لارو په څېر، د لیږد وړ کښتیو لوی شمېر او د هغو هېوادونو شمېر چې د ګډو سیمه ایزو اوبو څخه له تېریدو سره ورته لاسرسی ترلاسه کېدی شي، د قاچاق او سمندري عملیاتو سره مخ دي."

"په هرصورت، امنیتي تاوتریخوالی نړیواله ټولنه دې ته وهڅوله چې د سیمې د هېوادونو سره همکاري وکړي ترڅو سیمه خوندي کړي او د غیرقانوني عملیاتو مخه ونیسي."

هغه وویل، "دې کار د سمندري غلو او قاچاقبرانو ګټې زیانمنې کړې او دوی یې د پیسو د یوې بدیلې سرچینې په لټولو باندې مجبوره کړي."

د المري په وینا، آی آر جي سي له هغه وخته له وضعیت څخه ګټه پورته کړې ده.

هغه وویل، "قزاقان او قاچاقبران اوس د هغې په لاسونو کې وسیلې ګرځیدلي دي، او په ټوله سیمه کې خپلو ملګرو ته د وسلو د لیږد لپاره کارول کیږي." "آی آر جي سي وکولای شول چې سمندري غله او قاچاقبران استخدام کړي چې د دې عملیاتو د ترسره کولو لپاره د پیسو په ورکولو سره د دې لپاره کار وکړي."

هغه زیاته کړه چې د سمندري غلو "یوازینۍ اندیښنه ګټه ده، پرته لدې چې د عملیاتو پایلو ته پام وکړي."

المري وویل، د آی آر جي سي او د هغې د اړوندو ډلو لخوا د وسلو او غیرقانوني توکو دوامداره قاچاق په سیمه کې کړکیچ ته لمن وهي او ترهګریز عملیات ترسره کوي.

هغه په سومالیا کې ترهګرو ډلو ته د وسلو لیږد ته اشاره وکړه.

"د الشباب ترهګریز غورځنګ ته د یمن له لارې ایراني وسلې ورکړل شوې، چې د دغو [قاچاق] عملیاتو [له امله د رامنځته شوي] ګواښ جديتوب او د هغوی د مخنیوي اړتیا په ګوته کوي."

د قاچاق لارې

د سعودي پوځي کارپوه منصور الشهري په وینا، قاچاق معمولاً "د لرګیو د کب نیولو د کوچنیو کښتیو په واسطه ترسره کیږي چې اکثر رسمي اسناد نه لري او د جي پي اېس له وسیلو پرته [کار کوي]".

هغه وویل، لکه څنګه چې کښتۍ ساحل ته نږدې کیږي، "وسلې او قاچاق شوي مواد کوچنیو کښتیو ته لیږدول کیږي ترڅو یې ساحل ته ورسوي، او ځینې وختونه دا کښتۍ په کوچنیو بندرونو کې ډوبیږي."

هغه یادونه وکړه چې قاچاق وړونکي ممکن نسبتاً لویې کښتۍ هم وکاروي چې د جلبوټونو په نوم پیژندل کیږي.

هغه زیاته کړه، وسلې اکثرا "په پټو برخو کې پټې وي، او کښتۍ د ځان پټولو لپاره مختلف مواد لیږدوي."

الشهري وویل، په قاچاق شويو توکو کې د هر ډول مهماتو نه علاوه د "مختلفو ډولونو پوځي ټوپکونه، بمونه، توغندي، د راکټ په وسیله د لاسي بمونو لانچرونه، د ټانک ضد راکټ لانچرونه، د بوبي ټرېپ ډرون ټیکنالوژۍ او د منځني واټن توغندیو مواد شامل دي."

هغه وویل، د دغو بار وړلو د مخنیوي لپاره ترسره شوي عملیاتو او د مختلفو سرچینو، په ځانګړې توګه د عامو خلکو لخوا وړاندې شوي معلوماتو، د قاچاق د طریقو او تاکتیکونو په موندلو او د ترهګریزو بریدونو په مخنیوي کې مرسته کړې ده.

په قاهره کې میشته یمني خبریالې مونا محمد وویل، قاچاقبران او سمندري غله د عمان او یمن د ساحلونو په ګډون ډېرې لارې کاروي.

هغې زیاته کړه، "د سومالیا ساحلونه د یمن او سومالیا تر منځ د ګډو [سمندري] سرحدونو په واسطه هم کارول کيږي."

د مونا په وینا، بله لار د ایران په جنوب ختیځ کې د جاسک بندر څخه پیل کیږي او د باب المندب تنګي څخه تیریږي.

هغې وویل، "دا وسلې اکثرا د یمن سویلي ساحلونو او د الحدیده بندرونو، راس عیسی، سالف او د المحره او حضرموت په نشتون کې لیږدول کیږي، او اکثر د سومالیا په اوبو کې، په ځانګړې توګه د بوساسو سیمې او د عماني اوبو د ساحلونو څخه لرې، په کوچنیو کښتیو کې خالي کیږي."