بشري حقونه

د متحده آيالاتو ولسي جرګې په شنجيانګ کې د مسلمانانو پر ضد د جرمونو له امله چين ته د سزا ورکولو لپاره رايه ورکړه

د پاکستان فارورډ او ای اېف پي لخوا

image

د جرګې سپيکرې نېنسي پلوسي د دسمبر په ۲ مه په واشنګټن ډي سي کې په کیپیټل هیل کې د خپل اونيز مطبوعاتي کانفرنس لپاره راځي. [جیم واټسن/ای اېف پي]

واشنګټن، ډي سي -- د متحده ایالاتو د استازو مجلس د چهارشنبې په ورځ (د دسمبر په ۸ مه) یو قانون تصویب کړو چې د چین له شنجيانګ سیمې څخه د مسلمانانو سره د چلند له امله واردات محدودوي.

د جرګې غړو "د ایغور جبري کار د مخنیوي قانون" د تصویب کولو لپاره د ۱ ووټ په مقابله کې د ۴۲۸ رایه ورکړه، چې له مخې يې شرکتونه دې ته اړتیا لري چې "د روښانه او قانع کونکي شواهدو سره ثابت کړي" چې له سیمې څخه وارد شوي توکي د اجباري کار په کارولو سره ندي جوړې شوي.

سپيکر نېنسي پلوسي د رایه ورکولو نه مخکې وکیلانو ته وویل، "اوس مهال، بیجینګ د ایغور خلکو او نورو مسلمانو اقليتونو په وړاندې د زور زیاتي یو ظالمانه او ګړندی کمپاین ترسره کوي."

"په شنجيانګ کې، په ټول چین کې، په ملیونونو خلک د بشري حقونو له ناوړه سرغړونو سره مخ دي: د ډله ایزې څارنې او انضباطی پولیسۍ څخه تر ډله ایزو شکنجو پورې چې پکې د یوازیتوب بند او په جبري توګه شنډول، د ژورنالیستانو او فعالانو ډارول چې د حقیقت د افشا کولو جرات يې کړی شامل دي."

هغې زیاته کړه، "او د چین حکومت د اجباري کار څخه ناوړه ګټه اخیستنه د بحرونو له لارې زموږ ساحلونو او ټولې نړۍ ته رسيږي."

د متحده آيالاتو سنيټ مخکې هم ورته اقدام تصویب کړی و او دواړه به اوس پخلاینې ته اړتیا ولري.

بیا به دا قانون د صدر جو بایډن لخوا لاسلیک شي.

دا رایه لږ وروسته له هغې ترسره شوه کله چې سپینې ماڼۍ د چین لخوا د ایغور اقلیت د نسل وژنې او د بشري حقونو د نورو سرغړونو له کبله د بیجینګ ۲۰۲۲ وينټر اولمپکس څخه د سفارتي بایکاټ اعلان وکړو، چې دا يو داسې اقدام دی چې بیجینګ یې په کلکه غندنه وکړه.

د دې ګرمۍ په پیل کې، د متحده ایالاتو حکومت د ایغورانو سره د بیجینګ د چلند له امله د سولر پېنل موادو په شمول په ځينو چينايي وارداتو باندې ورته بنديزونه ولګول.

د اولمپیک سفارتي بایکاټ

د صفر په مقابله کې د ۴۲۸ ووټونو په جلا رایو کې، ولسي جرګې یو پریکړه لیک هم تصویب کړو چې پکې ویل شوي چې د اولمپیک نړیواله کمېټي د خپلو بشري حقونو ژمنو په پلي کولو کې پاتې راغلې، پداسې حال کې چې د هغه چینايي ټینس ستوري پینګ شوای د خوندیتوب په اړه شکونه شتون لري، کوم چې د کمونست ګوند یو لوړ پوړی مشر د جنسي تیري په تور تورن کړی دی.

کمپاین کوونکي وايي، لږ تر لږه یو میلیون ایغور او نور هغه کسان چې په ترکي ژبه خبرې کوي، چې زياتره پکې مسلمان اقلیتونه دي، د چین په شمال لوېدیځ شنجيانګ کې په کېمپونو کې بندیان دي.

د بشري حقونو ډلو او بهرنیو حکومتونو شواهد موندلي چې د دوی په وینا ډله ایز توقیفونه، جبري کار، سیاسي تعصب، شکنجه کول او جبري شنډول په کې شامل دي. واشنګټن دا نسل وژنه بللې ده.

په پیل کې په شنجيانګ کې د کېمپونو د شتون څخه د انکار کولو وروسته، چين بیا وروسته د دغه کېمپونو دفاع وکړه او ويې ويل چې دا د فني زده کړو مرکزونه دي چې موخه يې د اسلامي افراطیت کشش کمول او کاري فرصتونه ښه کول دي.

د کېمپونو په اړه بې شمیره خپلواکې څیړنې یو ډیر ناوړه حقیقت په ګوته کوي.

د بز فيډ نیوز تحقیق، چې په اګست ۲۰۲۰ کال کې خپور شوی و، د شنجيانګ په سیمه کې په سلګونو ودانۍ وموندلې چې د زندانونو یا د توقیف خونو نښې یې لرلې، چې ډیرې پکې په تېرو دریو کلونو کې جوړې شوي وې.

نورو تحقیقاتو چې په تېر دسمبر کې خپاره شوي وو په ډاګه کړه چې دغه کمونیست دولت په شنجيانګ کې تر ۱۰۰ څخه ډیرې نوي توقیف خونې جوړې کړي دي .

په وروستیو پلټنو کې، پخوانیو بندیانو او ساتونکو څرګنده کړه چې په دې کېمپونو کې پر مسلمانو ښځو په منظمه توګه جنسي تیری کیږي، شکنجه کیږي او په جنسي توګه ورسره ناوړه چلند کیږي.

په یو نوي راپور کې چې د چهارشنبې په ورځ خپور شو، د اویغور د بشري حقونو پروژه -- چې په متحده آيالاتو کې میشته یوه مدافع ډله ده -- وويل چې دوی له ۳۰۰ څخه زیات ایغور او نور مسلمان عالمان په ګوته کړل چې په شنجيانګ کې له ۲۰۱۷ کال راهیسې په توقيف کې دي.

آیا دا لیکنه ستاسو خوښه شوه؟

تبصرې 0

د تبصرو تګلاره * ضروري برخې ښيي 1500 / 1500