امنیت

ایران په داسې حال کې د ټانکر د تښتولو د هڅې په تور تورن شوی چې په خلیج کې کړکيچونه وده کوي

د پاکستان فارورډ او ای اېف پي لخوا

image

د جولای په ۲۹مه د فجیره خلیج امارات بندر ته نژدې په اېم ټي مرسر سټريټ باندې بريد وشو. د بریتانیې یو امنیتي ساتونکی او د رومانیې کارمند په دغه بريد کې ووژل شول، چې متحده ایالاتو او بریتانیې وويل چې دا د ایران د بې پیلوټه الوتکې برید و. [کریم صاحب/ای اېف پي]

متحده ایالاتو د چهارشنبې په ورځ (د اګست په ۴مه) وویل چې دا ګمان لري چې د عمان په خلیج کې په ښکاره توګه د یوې کښتۍ په تښتولو کې ایران لاس لري ځکه چې دې ژمنه کړې چې له انګلستان سره به د هغه پخوانې وژونکي برید په اړه کار وکړي چې تهران یې په تور تورن کړی.

عمان وویل د اسفالټ شهزادګۍ، چې د اسفالټ او بټومېن ټانکر دی، د سه شنبې په ورځ "په نړیوالو اوبو کې د تښتونې په پیښه" کې ښکیل وه، او دغه سلطنت الوتکې او بحري کښتۍ ځای په ځای کړې وې.

د انګلستان د سمندري سوداګرۍ عملیاتو (يو کی اېم ټي او) په پيل کې د کښتۍ دغه پيښه د "احتمالي تښتونې" په توګه د بيانولو څخه مخکې د "غیر قزاقي" پیښې په توګه راپور کړې وه.

د بار وړلو صنعت د استخباراتو ويب پاڼې لایډ لیست راپور ورکړو چې وسله وال سړي اسفالټ شهزادګۍ ته داخل شول او هغې ته يې ایران ته د تګ امر وکړو.

image

د اسفالټ شهزادګۍ کښتۍ د عمان په خلیج کې د فجیره بندر ته څیرمه په نړیوالو اوبو کې د تښتونې په پیښو کې ښکیل وه. متحده ایالاتو وویل چې دا ګمان لري چې ايران د عمان په خلیج کې په دغه تښتونه کې لاس لرلو. [يو کی اېم ټي او/ټویټر]

متحده ایالاتو او انګلستان وویل چې دا ناوړه پیښه یوه ورځ وروسته پای ته ورسیده، په داسې حال کې چې تښتونکو د پاناما کښتۍ پریښوده.

د بهرنیو چارو وزارت ویاند نیډ پرائس د چهارشنبې په ورځ وویل، "موږ باور لرو چې دا کسان ایرانيان ول."

پرائس وویل، "ایران په سیمه کې د پراکسي بریدونو او بې شکه د دې سمندري بریدونو په ترسره کولو سره د جګړې یوه بڼه غوره کړې"، په داسې حال کې چې هغه زياته کړه چې د دې تازه پیښې په اړه نور تفصيلات هم مخې ته راځي.

د عمان د دفاع وزارت وویل چې د دې هوایي ځواک اسفالټ شهزادګۍ ته نږدې الوتنې ترسره کړې، او د هغې بحري ځواکونو د اوبو د خوندي کولو لپاره ګڼ شمیر کښتۍ ځای په ځای کړې.

دې وویل چې د کښتۍ "احتمالي تښتول" د متحده عرب اماراتو د فجیره بندر څخه ۱۰۰ کیلومتره لرې په ختیځ کې ترسره شول کله چې دا د هرمز تنګي په لور روانه وه، چې د نړۍ ترټولو زياته بوخته د اوبو لار ده.

همغږيز غبرګون

په عین وخت کې، د سمندري امنیت شرکت امبري د پنجشنبې په ورځ وویل چې د بریتانیې يو امنیتي ساتونکی چې تیره هفته د عمان ساحل ته نږدې د میرسر سټریټ ټانکر کې د ایران په شکمن ډرون برید کې وژل شوی و، د برتانیې د پوځ پخوانی سرتیری و.

د رومانیا یو کپتان هم د جولای په ۲۹مه د اېم ټي مرسر سټريټ باندې په برید کې وژل شوی و، کوم چې په لندن کې د اسراییل د میلیاردر اییل اوفر لخوا اداره کیږي، کله چې دا په بحېره عرب کې مسیرا ټاپو ته نږدې تیریده.

متحده ایالاتو، انګلستان او اسراییل ایران په دې برید کې په لاس لرلو تورن کړی دی.

د بریتانیې وزیر اعظم بورس جانسن دغه برید "د نه منلو او د غوسې وړ" بللی او ایران ته یې د پایلو خبرداری ورکړی.

د متحده ایالاتو د بهرنیو چارو وزیر انتوني بلینکن د چهارشنبې په ورځ د انګلستان د بهرنیو چارو له وزیر ډومینک راب سره د روانو هڅو په اړه خبرې اترې وکړې چې په مرسر سټړيټ باندې د ایران د برید پروړاندې يو همغږيز غبرګون وښيي.

امنیتي شنونکو ویلي چې دغه وژونکي برید د ایران او د اسراییلو پورې تړلو کښتیو پروړاندې "د پراکسي جګړې" د خطر کچه لوړه کړې.

د اسراییلو د دفاع وزیر بیني ګانټز په بیت المقدس کې له سفیرانو څخه وغوښتل چې "ایران دې د خپلو کړنو لپاره محاسبه شي".

هغه د اسلامي انقلابي ګارد قول اردو (آی آر جي سي) د یو لوړ پوړی افسر نوم واخيستو چې ويې ويل چې هغه په ټانکر باندې د برید او نورو بریدونو مسوليت په غاړه لري.

ګانټز وویل، "سعید آرا جاني د آی آر جي سي د بې پیلوټه الوتکې (يو ای وي) کمانډ مشر دی." "دا هغه سړی دی چې د عمان په خلیج کې د ترهګریزو بریدونو مسؤل دی."

دا کړکیچونه په داسې حال کې راپورته کیږي چې د ایران نوی صدر ابراهیم رئیسي د پنجشنبې په ورځ په پارلمان کې حلف پورته کوي، په داسې حال کې چې ایران يو داسې اقتصاد لري چې د بندیزونو له کبله ځپل شوی، او د سخت روغتیایي بحران او د خپل اټومي پروګرام په اړه د سختو خبرو اترو سره مخ دی.

آیا دا لیکنه ستاسو خوښه شوه؟

تبصرې 0

د تبصرو تګلاره * ضروري برخې ښيي 1500 / 1500