خیريه موسسې د کورونا ویروس اغیزې کمولو لپاره په قبایلي ضلعو تمرکز کوي

خار، باجوړ ضلعه -- ځايي خیریه موسسې د باجوړ ضلعې له اوسیدونکو سره کار کوي چې د کورونا ویروس د خپریدو پرمهال د اورپکۍ لخوا په ځپل شويو قبایلي ضلعو کې زیانمنو خلکو ته مرستې ورسوي.

د الخدمت فاونډېشن (ای کی اېف)، چې د پاکستان په مختلفو سیمو کې يې په زرګونو اوسیدونکو سره مرسته کړې ده، په هغه خیریه موسسو کې ده چې خلکو د مرستې لپاره ځان رسوي، په داسې حال کې چې دغه وبا دندو او عامې روغتیا ته زيان رسوي.

د الخدمت فاونډېشن د باجوړ فصل صدر خليل الله جان وويل، "موږ نه يوازې د ضرورت مندو کسانو سره مرسته کوو ... بلکې د هغه کسانو سره هم مرسته کوو چې د کورونا ويروس له کبله قرنطين شوي دي."

هغه وويل، "مونږ له پکار ده چې په دې سخت وخت کې د هغو خلکو ملاتړ او مرسته وکړو چې اوس بې روزګاره دي او په لاک ډاون کې دي."

د اورپکۍ لخوا په ځپل شويو قبایلي ضلعو کې اوسیدونکي له دې امله د خیریه موسسو هڅو ستاینه کوي چې هغوی ته ځان رسوي.

د باجوړ ضلعې یو قومي مشر ملک ظاهر وویل، "موږ خوشحاله یو چې دا خیريه موسسې په دې بحران کې د بیوزلو سره مرسته کوي -- دوی ستر خلک دي."

'یو ډیر ستونزمن حالت'

هغه وویل، "د اورپکۍ دور موږ ته دا ښوولې ده چې موږ باید په داسې بحرانونو کې متحد پاتې شو، ځکه چې زموږ سیمې په تیرو وختونو کې د ناوړه پيښو سره مخ شوي دي."

خايسته محمد، چې په خار سوداګريز مرکز کې يو کارکونکی دی، وویل چې "وسله وال خورا بد خلک وو، او دوی له ضرورت مندو خلکو سره مرسته نه کوله، خو اوس دا ښه خلک له موږ سره په یو ډیر ستونزمن حالت کې مرسته کوي."

محمد د مزدورانو لپاره د وزيراعظم عمران خان د مالي مرستې د پلان ستاینه وکړه.

هغه د اړمنو کورنیو لپاره د حکومت د مالي مرستې نوښت ته په اشارې سره وویل، "ما د احساس کفالت پروګرام لاندې ۱۲،۰۰۰ روپې (۷۵ امريکايي ډالره) نغدي پيسې هم ترلاسه کړې."

هغه زیاته کړه، "اوس زه د یوې میاشتې لپاره د مزدورۍ له لاسه ورکولو وېره نه لرم ځکه چې ما خپله مزدوري له حکومت څخه ترلاسه کړه."

د خوراک ورکولو نه علاوه، ډیر کسان او خيريه موسسې د مخ ماسکونه ويشي چې کاروونکي د کورونا ويريوس ناروغۍ نه خوندي وساتي.

د باجوړ ځوان، چې يوه ځایي خیریه موسسه ده، په سیمه کې د وبا د خپریدو راهیسې وړیا ماسکونه ويشلي دي.

د باجوړ ځوان چيرمېن ريحان زيب خان وویل، "موږ هغو خلکو ته ماسکونه ورکړي چې له نورو ښارونو څخه په ځانګړي توګه له کراچۍ او د سیند د نورو برخو نه راځي، چې د خپلې سیمې اوسیدونکي له کورونا ویروس څخه خوندي وساتو."

هغه وويل، "پاکستانیان په خیرات ورکولو کې په لومړی نمبر دي، او موږ تل ښودلې چې مونږ په سختو وختونو کې یو قوم یو."