د تحريک طالبان پاکستان سخت نقاد ژمنه کوي چې د چاودنې څخه د ښه کيدو وروسته به جګړې ته دوام ورکړي

خار -- مولانا ګل داد خان، چې د تحریک طالبان پاکستان یو سخت مخالف دی، په تیر کال کې په يوې بمي چاونه کې د زخمونو له ښه کيدو وروسته اوس هم د وسله والو پرضد خبرې کوي.

خان، چې ۶۵ کاله عمر لري، د تير جون په میاشت کې د باجوړ ضلعې په ناواګۍ سيمه کې خپلې استوګنځي ته نږدې په یوې بمي چاودنه کې د پنځو نورو ملګرو سره ژوبل شوی و. د هغه په ساتونکو کې يو کس، فضل هادي، وروسته د زخمونو له کبله مړ شو.

خان په نويو ضم شويو قبایلي سیمو کې په هغه يو څو دیني مشرانو کې دی چې له اوږدې مودې راهیسې يې د وسله والو مخالفت کړی دی او د پولیو واکسینو ملاتړ يې کړی دی.

خان وویل، "ما تل دوی د تحریک طالبانو پرځای د تحریک ظالمانو [وحشي خلک] په نوم ياد کړل او د دوی له بریدونو سربيره به خپلې مبارزې ته دوام ورکړم."

هغه وویل، "ما ټي ټي پي ته د مناظرې لپاره چيلنج ورکړی چې دا ثابته کړم چې دوی غلط دي او د اسلام په نوم بې ګناه خلک وژني." "د اسلام په اړه د دوی نظريې غلطې دي، او زه به دا ثابته کړم که چيرې دوی د پاکستان په هر ځای کې خبرو ته چمتو شي."

خان په دسمبر ۲۰۰۷ کال کې په ناوګۍ کې د تحريک طالبان پاکستان لخوا د فرنټیر کور (اېف سي) سرتیري له وژلو وروسته مشهور شو.

که څه هم تحریک طالبان هر هغه کس ته ګواښ وکړو چا چې د سرتیري بدن سمبال کړو، خو خان د دغه سرتيري پاتي شوني ترلاسه کړې او امنیتي ځواکونو ته یې بیرته وسپارلې.

له هغه وروسته، وسله والو خان، د هغه کورنۍ او د هغه ملګري ۱۷ ځله په نښه کړي دي. په دې بریدونو کې، د خان د کورنۍ د پنځو غړو په ګډون، نهه کسان وژل شوي او ۲۲ نور ژوبل شوي دي.

په مړو کې امین الله خالد شامل دی، چې هغه د خان زوی دی او په می ۲۰۱۵ کال کې په یوې بمي چاودنه کې وژل شوی و.

خان پخپله دوه ځله ژوبل شو، په لومړي ځل په مارچ ۲۰۰۹ کال کې کله چې وسله والو د هغه په کلي او کور برید وکړو.

خان وویل، "زه دوی د تحریک ظالمان په نوم یادوم ځکه چې دا د بې ګناه خلکو او امنیتي ځواکونو قاتلان دي او دا ځکه چې دوی د اسلام په نوم بې ګناه خلک غولوي."

خان وویل، "زه به د وسله والو د بريدونو سربیره خپل ماموریت ته دوام ورکړم، او زه به د خپلې وينې د آخرنۍ څاڅکې پورې د تحریک طالبان پاکستان پر وړاندې خپل غږ پورته کړم."

هغه زیاته کړه، "زه به په باجوړ کې پاتې شم او تر څو پورې چې زه ژوندی يم، زه به خپلې مبارزې ته دوام ورکړم."

په سوله کې کلیدي رول

د باجوړ يو ځايي مشر شیخ جهانزاده وویل، "ګل داد د سولې په بحالۍ کې مهم رول لوبولی دی، او هغه تل په سیمه کې د سولې په راوستو کې د امنیتي ځواکونو ملاتړ کړی دی، ځکه چې هیڅ څوک چمتو نه و چې د اورپکۍ په دور کې يې د امنیتي ځواکونو سره مرسته کړی وای."

جهانزاده وویل، "حکومت دې د سولې لپاره د هغه او د هغه د ملګرو قربانیو له کبله هغه ته صدارتي انعام ورکړي."

هغه وویل، "موږ په خپله خاوره سوله غواړو ځکه چې شخړې زموږ په ټولنه او ژوند باندې خورا ناوړه اغیزه کړې ده."

ملک ظاهر، چې په باجوړ ضلعه کې د ناواګۍ سیمې ځايي مشر دی، وویل، خان هغه په وخت کې د پاکستان د امنیتي ځواکونو سره مرستې کړې کله چې تحریک طالبان پاکستان ډيره مشهوره وه او هيڅوک تيار نه و چې د وسله والو پر وړاندې غږ پورته کړي.

هغه وویل، "د امنیتي ځواکونو لپاره د هغه د قوي ملاتړ له امله، د هغه ډیر ملګري او د کورنۍ غړي په نښه شول."

ظاهر زیاته کړه، "ګل داد خان د قبایلي ضلعو یوازینی مذهبي مشر دی چې تحریک طالبان پاکستان ته يې د بحث لپاره چيلنج ورکړو او یوازینی مشر دی چې دوی د تحریک ظالمان په نوم يادوي."

د ظاهر په وینا، خان په ۲۰۰۹-۲۰۱۰ کې د تحريک طالبان پاکستان پروړاندې د یاغیانو پرضد د شيردل عملیاتو بشپړ ملاتړ وکړو. هغه په اېف ايم راډیو چینل امن راډیو باندې خبرې وکړې چې د تحريک طالبان پاکستان د منفي تاثیراتو په اړه اوریدونکي خبر کړي.

هغه وویل، "د ګل داد خان ويناګانو د امنیتي ځواکونو لپاره لاره هواره کړه ... چې د ګل داد له ملاتړ وروسته يې په اسانۍ سره تحريک طالبان پاکستان ته ماتې ورکړو."