https://pakistan.asia-news.com/ps/articles/cnmi_pf/features/2019/07/04/feature-01
اقتصاد

د مهمند ډېم پروژه د ځایي اوسیدونکو لپاره هیلې رامنځته کوي

د ظاهر شاه شيرازي لخوا

image

د مهمند ډېم لپاره د لاس رسۍ په سړکونو باندې د می په ۳۱ مه ساختماني کار روان دی. [د ظاهرشاه شیرازي نه په مننه]

غلنۍ -- د مهمند ضلعې اوسېدونکي د نوي ډېم د جوړولو په اړه خوشبین دي، چې تمه کیږي دا به په دغه سیمه کې پرمختګ روالي.

وزيراعظم عمران خان د می په ۲ مه د مهمند ډېم هايډرو پاور پروژې، چې د اوږدې مودې رهيسې يې خلکو انتظار کولو، پرانيسته وکړه.

د پنځو عشرو نه د زیاتې مودې لپاره له ځنډیدلو وروسته، دا پروژه به په جولای ۲۰۲۴ کال کې بشپړه شي. دا ډېم به ۱.۲ مليونه جريبه اوبه (ايم ای ايف) ذخیره کړي، د کم لګښت ۸۰۰ میګاواټه بجلي به پيدا کړي او په پيښور، چارسده او نوښار کې به د سیلابونو په کمولو کې مرسته وکړي.

دا پروژه به نږدې ۱۶،۷۰۰ جریبه نوي ځمکه اوبه کړي او پیښور ته به هره ورځ ۳۰۰ میلیونه ګیلنه د څښاک اوبه برابر کړي.

image

د ۲۰۱۱ کال د جولای په ۲۰ مه په دې انځور کې پاکستاني کورنۍ د سوات سيند په غاړه د بحرین په مشهور غرنۍ سیمه کې بهر په روايتي کټونو کې ناست دي. دا نوی ډېم چې په مهمند کې جوړيږي د سیلابونو په کمولو کې مرسته کولی شي. [ای مجید/ای ايف پي]

د اوبو او د بجلۍ د پراختیا اداره (واپډه)، چې د ډېمونو د جوړولو دنده لري، له مخکې نه د دې پروژې څو برخې بشپړې کړي دي.

په دې کې د پروژې په سيمه کې د موسم مرکز جوړول او د سوات سیند په اوږدو کې آلات نصب کول شامل دي چې د اوبو د بهيدو او د لومړني جیو تخنیکي بور کولو ارزونه وکړي.

په عین وخت کې، د سیند په دواړو غاړو کې د لاس رسۍ په دايمي سړکونو باندې کار په زور سره روان دی. ۱۵.۵ کلومټره اوږد سړک، چې د منډه هيډورکس نه پيل کيږي، به د ډيم، د اوبو لارې او د اوبوخور د سرنګانو د جوړولو لپاره لاسرسی چمتو کړي.

د واپډا چيرمين لفټننټ جنرل (ريټايرډ) مزمل حسین او نورو چارواکو، د قومي اسمبلۍ (اين ای) د غړي ساجد خان په ګډون، د می په ۳۱ مه د کار ځای ته لاړل.

حسين وويل، "د مهمند ډېم پروژه به د ۶،۰۰۰ نه زيات کارونه برابر کړي."

هغه وويل، "د ځمکې او شتمنیو لپاره د معاوضې نه علاوه، د پروژې د سیمې پراختیا لپاره به ۴.۶۱ میلیارده روپۍ (۲۸ مليونه امریکایي ډالره) د اعتماد جوړولو تدابیرو په توګه خرچ کړې شي، چې تعليم، روغتیا، د اوبو رسولو، سړکونو، د ونو کرلو او د کبانو د ساتلو فارمونو ته به په ځانګړی توګه پام وکړل شي."

هغه وويل، د خیبر پښتونخواه د لرې پرتو سیمو د پراختیا نه علاوه، د مهمند ډېم د بجلۍ پروجيکټ به په راتلونکې کې د ملي اقتصاد په ښه کولو کې مرسته وکړي ځکه چې دا به په هیواد کې د اوبو او بجلۍ د مخ پر زياتيدو غوښتنې په پوره کولو کې مرسته وکړي.

'يو ريښتينې خوب'

خان، چې د قومي اسمبلۍ غړی دی او د مهمند ضلعې استازیتوب کوي، وویل، "هر څوک به د دې پروژې د بشپړېدو پورې خپله ټوله مرسته په دوامداره توګه چمتو کړي، او سیمه ایز خلک به له دې پروژې نه زياته ګټه پورته کړي."

هغه دا ډېم د "يو رښتیني خوب" په توګه وبللو او زیاته یې کړه چې خلک به د دې پروژې له کبله ټولنیز او اقتصادي پراختیا، د کار فرصتونه او په بې وزلۍ کې کمې وويني.

فوزي خان مهمند، چې په مهمند کې يو قبايلي ژورنالسټ دی، وویل، دا ډېم د مهمند لپاره "د سولې يوه لویه نښه" ده، چې د ترهګرۍ لخوا ځپل شوی دی او د پرمختګ کولو نه پاتې شوی دی.

هغه وويل، ځايي اوسيدونکي "خوشبين او خوشحاله دي ځکه چې دوی نوي دندې ويني او دا د ضلعې د بهبود لپاره د اميد يوه رڼا ده."

افتاب مهمند، چې يو بل قبايلي ژورنالسټ دی او په مهمند کې ميشت دی، وویل، که چيرې دا ډېم د پنځو عشرو نه د زياتې مودې لپاره نه وې ځنډول شوی، نو په دې ضلع کې به اورپکي، وینه تويول او د بې ګناه خلکو وژل نه وو رامنځته شوې.

هغه وويل، "دا ډېم د سولې او پرمختګ رښتیني نښه ده ... دا به د سیمې په ټولنيز او اقتصادي پرمختګ کې مرسته وکړي، چې د ترهګرۍ او اورپکۍ له امله خورا ځپل شوي ده."

شاهسوار مهمند، چې په مهمند کې د پرمختيا ماهر دی، وویل، دا پروژه به "دا ضلع مشهوره کړي ځکه چې د اړیکو شبکې به دا سیمه د بهرنۍ نړۍ سره وتړي، سرمايه کاري به رامنځته کړي او سیمه ایز تجارت ته به وده ورکړي ... دا ډېم به د سیمه ییز تجارت او د سوداګرۍ لپاره د اقتصادي کتلست په توګه کار وکړي."

هغه زياته کړه، دا ډېم به د ځايي ځوانانو لپاره دندې رامنځته کړي او دوی به د اورپکۍ په لاس د ورتلو نه منع کړي.

آیا دا لیکنه ستاسو خوښه شوه؟

تبصرې 3
د تبصرو تګلاره * ضروري برخې ښيي 1500 توري پاتې دي (تر 1500 پورې)

دا زما خوښ دی

ځواب

آيا تاسو څه معلومات لرئ، کله به دا کار پيل کيږي؟

ځواب

که چیرې ۱۸ کسيزه ملي کمیټي لرې شي، نو بيا به د پرمختګ او کار زمینه مستقيمه وي. که چيرې هماغه دوديزه وطن پرستي موجود وي، نو بيا تاسو د پرمختګ تمه نه لرئ.

ځواب