https://pakistan.asia-news.com/ps/articles/cnmi_pf/features/2018/03/15/feature-02
| اقتصاد

په شمالي وزیرستان کې بيا پرانيستل شوي لاره به د پاکستان او افغانستان تر مينځ سوداګرۍ ته وده ورکړي

د عديل سعيد لخوا

image

یوه لارۍ، چې د توکو نه ډکه ده، د مارچ په ۹ مه د غلام خان د پولې له لارې افغانستان ته ځي. [عصمت شاه]

پیښور -- د پاکستان سوداګریزې ټولنې د افغانستان او پاکستان تر مینځ په پوله باندې د مهمې لارې بيا پرانيستلو ته هرکلی کړی دی او دا په سیمه کې د اقتصاد د ودې لپاره یو مهم عنصر ګڼي.

د پاکستان چارواکو د مارچ په ۹ مه د غلام خان د تګ راتګ لاره بيا پرانیستله، چې د شمالي وزیرستان ایجنسۍ له لارې د افغانستان او منځنۍ آسیا هیوادونو سره د سوداګرۍ د پراختیا لپاره یې لاره هواره کړه.

چارواکو د ۲۰۱۴ کال په جون کې وروسته له هغې دغه لاره بنده کړه کله چې پاکستاني پوځیانو شمالي وزیرستان د ترهګرو نه د پاکولو لپاره ضرب عضب عملیات پیل کړل.

image

چارواکي، سوداګران او ځايي خلک د مارچ په ۹ مه په شمالي وزیرستان کې د غلام خان د لارې بيا پرانیستلو سره افغانستان ته د ټرکونو د تلو نه مخکې دعاګاني کوي. [عصمت شاه]

د شمالي وزیرستان پوليټيکل ايجنټ، کامران آفريدي، مشال راډيو ته وويل، "په شمالي وزیرستان کې د سولې د بيابحالۍ نه وروسته، پاکستانی چارواکو د افغانستان او منځنۍ آسیا هیوادونو سره د غلام خان له لارې تجارت بیا پیل کړی دی."

د آفريدي له مخې، دا لاره په عارضي ډول بیا پرانستل شوې ده. په لومړيو کې، يوازې ۱۵ لارۍ به په ورځ کې د پولې څخه تېريږي. د ګاډو شمېر به د وخت تيريدو سره زيات شي.

په پيښور کې کسټمز کلکټر، محمد سعيد خان جدون، پاکستان فارورډ ته وويل، "د [مارچ په ۹ مه]، د څلورو لاریو یو کاروان، چې مختلفې سوداګریزې توکې يې لرلې، د دغه لارې افغانستان ته لاړ. په دغه توکو کې میوې، سبزي، سیمنټ او نور شيان شامل ول."

د جدون له مخې، د پاکستان کسټمز چارواکو د غلام خان له لارې د توکو د لیږدولو لپاره تياری کړی دی، خو د امنیتي اندیښنو له کبله د زيات شمير توکو په ليږدولو کې ستونزې رامنځته شوي دي.

لګښتونه کمول

د پولې دواړو غاړو ته سوداګران تمه لري چې د لارې بيا پرانيستل به د روزګار فرصتونه رامنځته کړي. .

زاهد الله شينواری، چې د سرحد د سوداګرۍ او صنایعو خونو صدر دی او د پاکستان او افغانستان د صنايعو او سوداګرۍ د ګډې خونې پخوانی صدر دی، پاکستان فارورډ ته وویل، د غلام خان د لارې بیا پرانيستل "یوه ښه پریکړه ده او د پاکستان او افغانستان ترمنځ په سوداګرۍ به مثبت اغیز ولري."

هغه وويل، "د غلام خان د لارې بيا پرانستل به د ليږدولو کم لګښت له کبله د افغانستان سره سوداګرۍ ته په وده ورکولو کې مرسته وکړي."

هغه وويل، د پاکستان او افغانستان تر منځ سوداګري په ۲۰۱۴-۲۰۱۵ مالي کال کې د ۲.۷ ميليارده ډالرو په نسبت په ۲۰۱۶-۲۰۱۷ مالي کال کې ۱.۶ ميليارده ډالرو ته راټيټه شوه.

شینواري د افغان حکومت څخه وغوښتل چې په ورته ډول اقدامات وکړي او د توکو د کليرنس او لیږدولو لپاره اسانتیاوې برابرې کړي.

د شمالي وزيرستان يو سوداګر، عبدالله خان، وويل، په تېرو درې نيمو کالو کې د وزيريستان سوداګرانو د غلام خان د لارې د تړلو له امله ډېر زیانونه زغملي دي.

خان به مخکې ازبکستان ته د غلام خان د بنديدو له کبله د چمن او خرلاچي، چې په بلوچستان او کرم ايجنسۍ کې موقعیت لري، له لارې مالټې ليږلې.

د خان له مخې، د شمالي وزیرستان نه ازبکستان ته د دغو لارو له لارې په ۲۰ کیلوګرامه مالټو باندې ۶۰ ډالره لګښت راتلو. د غلام خان له لارې د ورته مقدارونو مالټو په لېږلو باندې یوازې ۳۵ ډالره لګښت راځي.

سوداګریزو فعالیتونو ته وده ورکول

عمر وزير، چې په قبايلي ايجنسۍ کې يو خبريال دی، وويل، "د غلام خان د لارې بيا پرانستل به په شمالي وزيرستان کې د سوداګريزو فعاليتونو نوى دور پيل کړي."

هغه پاکستان فارورډ ته وویل، د دغه لارې د بيا پرانیستلو برسیره، د پاکستان حکومت د متحده آیالاتو د نړیوالې پرمختیا ادارې په مرسته ۸۲ کلو ميټره اوږد بنو- میرانشاه-غلام خان سړک هم جوړ کړو.

هغه وویل چې د ۸.۷ میلیارده پاکستانۍ روپو پروجيکټ موخه دا ده چې افغانستان او منځنۍ آسیا ته د توکو لیږل آسان کړي.

هغه وويل، "دا سړک، چې اوس خلاص دی، د ورځني کارمندانو او هغه کسانو لپاره په زرګونو کارونه رامنځته کړي کوم چې د ټرانسپورټ او میلمستيا په سکتورونو کې ښکيل دي."

آیا دا لیکنه ستاسو خوښه شوه؟
1
نه
تبصرې 0
د تبصرو تګلاره
Captcha