اسلام آباد -- جيو نيوز راپور ورکړو چې جنرل کينت ايف. مکينزي جونير، چې د امریکې د مرکزي کمانډ (سينټکوم) کمانډر دی، د دوشنبې په ورځ (د اپريل په ۸ مه) په اسلام آباد کې د وزیر اعظم عمران خان سره د بهرنۍ پاليسۍ په اړه خبرې وکړې.
دواړو مشرانو د متحده ایالاتو او پاکستان ترمنځ د اړیکو، د افغان سولې د روانو خبرو اترو او نورو روانو مسلو په اړه خبرې وکړې.
د پوځ د عامه اړيکو دفتر له مخې، مکینزي د یکشنبې په ورځ (د اپریل په ۷ مه) د پوځ د ستر مشر جنرل قمر جاويد باجوه سره هم وکتل.
هغوی د جیو ستراتیژیک چاپیریال او سیمه ايز امنیت، په افغانستان کې د حالاتو او د هند او پاکستان تر منځ د وروستي کړکيچ په اړه خبرې اترې وکړې.
مکینزي د مارچ په میاشت کې د جنرل جوزف ووټل له ريټاير کيدو وروسته د سينټکوم کمانډر شو.