راولپنډۍ -- ډان خبري اژانس راپور ورکړو چې د راولپنډۍ د تروریزم ضد محکمې د پنجشنبې په ورځ (د اګست په ۳۱ مه) د پخواني وزير اعظم بینظیر بهټو د وژلو په سلسله کې پنځه تنه پريښودل او دوه نورو تورنو کسانو ته یې د ۱۷ کالو د قيد سزا واوروله.
بهټو په دسمبر ۲۰۰۷ کال کې په راولپنډۍ کې وژل شوي وه.
محکمې د تحریک طالبان پاکستان پنځه تورن غړي پريښودل خو سعود عزيز، چې په هغه وخت کې د راولپنډۍ د پولیسو مشر وو، او خرم شهزاد، چې په راول ټاون کې د پولیسو پخوانی سپرنټنډنټ وو، ته یې د ۱۷ کالو د قيد سزا واوروله.
محکمې جنرل (ریټايرډ) پروېز مشرف، چې د هغې د وژلو په وخت صدر وو، یو مخرور (فراري) وګرځولو.