د پاکستان عدالت امر کوي چې پوځي او استخباراتي ادارې دې د سیاست نه ځان لرې وساتي

اسلام آباد -- د پاکستان سپريم کورټ د چهارشنبې په ورځ (د فبرورۍ په ۷ مه) د پوځي او استخباراتي ادارو غندنه وکړه او د هغوی څخه یې غوښتنه وکړه چې آزاده وینا برقرار وساتي او د سیاست نه ځان بهر وساتي.

دا غیر معمولي سخت انتقاد په هغه فيصله کې صادر شو چې په هغو احتجاجونو کې يې د استخباراتي ادارو د رول په کلکه غندنه وکړه چې په نومبر ۲۰۱۷ کال کې يې اسلام آباد د يو څو هفتو لپاره په ځای ودرولی و.

په دغه فيصله کې، چې د سپريم کورټ په ويب سايټ باندې خپره شوي ده، ويلی شوي ول، "که چیرې د وسله والو ځواکونو کارکونکي په سیاست کې په هره بڼه کې برخه واخلي یا هڅه وکړي چې د رسنیو مخنیوی وکړي، نو هغه د وسله والو ځواکونو بشپړتیا او مسلکیتوب کمزوری کوي."

د پاکستان اساسي قانون د وسله والو ځواکونو غړي په هر ډول په سیاسي فعالیتونو کې د برخې اخيستلو نه په کلکه منع کوي. دغه فيصلې زیاته کړه، حکومت او د پوځ، هوایې ځواک او بحري ځواکونو مشرانو ته امر ورکړل شو چې د هر هغه کس په وړاندې ګامونه پورته کړي چې د خپل حلف څخه سرغړونه کوي.

په ۲۰۱۷ کال کې تاوتریخوالی

په ۲۰۱۷ کال کې د مظاهرو مشري د هغه وخت اسلامي ډلې تحريک لبيک پاکستان (ټي ايل پي) کړي وه او وروسته له هغې منتشر شو کله چې د تاوتریخوالي د جګړو نه وروسته پوځ د هغوی سره معاهده وکړه او وزير قانون په استعفی ورکولو مجبوره شو.

ججانو په آزاده وینا باندې د بنديز نیوکه وکړه او استخباراتي ادارو ته يې سخت خبرداری ورکړو.

عدالت وويل، "د استخباراتو ټولې ادارې ... او د (پوځ د رسنۍ څانګه) باید د خپل اړوند حد نه زياتی ونه کړي. دوی د وينا او اظهار خيال آزادي نه شي ختمولی."

"هغه څوک چې دا ډول تاکتیکونه د دې غلط باور لاندې کاروي چې دوی د یو لوړ هدف لپاره کار کوي، خپل ځانونو ته دهوکه ورکوي."

په ورته وخت کې، د پاکستان د ښځو د حقونو مشهوره فعاله د امنیتي ځواکونو لخوا خوشې شوي ده، هغې د پنجشنبې په ورځ ای ايف پي ته وویل چې د بخښنې نړیوال سازمان ویلي چې هغه او نور کسان "پخپل سر" توقیف شوي دي.

ګلالۍ اسماعیل د پښتنو د ساتنې غورځنګ (پي ټي ايم) د ۱۷ نور کسانو سره د سه شنبې په ورځ په اسلام آباد کې د احتجاج په ترڅ کې نیول شوي وه.